Jacqueline Fernandez : जॅकलीन फर्नांडिसची तब्बल ८ तास चालली चौकशी

Jacqueline Fernandez Latest News मनी लाँड्रिंग प्रकरणी बॉलिवूड अभिनेत्री जॅकलीन फर्नांडिसची (Jacqueline Fernandez) दिल्ली पोलिसांनी सुमारे ८ तास चौकशी केली. पोलिसांनी जॅकलीनला २९ ऑगस्ट आणि १२ सप्टेंबरला बोलावले होते. मात्र, ती पोहोचली नव्हती. बुधवारी दिल्ली पोलिसांनी जॅकलीनला सुकेश चंद्रशेखरने (Sukesh Chandrashekhar) केलेल्या २०० कोटींच्या फसवणुकीबद्दल प्रश्न विचारले.

दिल्ली पोलिस आणि ईडी कथित प्रकरणाचा स्वतंत्रपणे तपास करीत आहेत. गेल्या महिन्यात ईडीने जॅकलीनला आरोपी केले होते. या प्रकरणात पोलिसांनी कारागृह अधिकारी, बँकर्स, खासगी व्यक्तींना अटक केली आहे. त्यांनी सुकेश चंद्रशेखरला मदत केली होती. आजपर्यंत पोलिसांनी जॅकलीनची चौकशी केली नव्हती.

सुकेश चंद्रशेखरसोबतचे तिचे नाते आणि दिलेल्या भेटवस्तूंबाबत दिल्ली पोलिसांनी जॅकलीनची (Jacqueline Fernandez) चौकशी केल्याचे वृत्त आहे. सुकेशला किती वेळा भेटली आहे आणि दोघांचे फोनवर किती वेळा बोलणे झाले, असे प्रश्न जॅकलीनला विचारण्यात आले. जॅकलीन फर्नांडिस फेब्रुवारी ते ऑक्टोबर २०२१ पर्यंत सुकेशच्या संपर्कात होती.

सुकेश चंद्रशेखरने (Sukesh Chandrashekhar) दिल्लीतील व्यावसायिकाच्या पत्नीची २१५ कोटींनी फसवणूक केल्याचा आरोप आहे. त्यावेळी सुकेश दिल्लीच्या तुरुंगात होता. सुकेशने एकदा पंतप्रधान कार्यालय, कायदा मंत्रालय आणि गृह मंत्रालयाचे अधिकारी असल्याचे भासवून पैसे उकळले.

सुकेशने फोनवर दावा केला होता की तो पीडितेच्या पतीला जामीन मिळवून देईल. तसेच व्यवसायाला पुनरुज्जीवित करेल. जॅकलीनचे सुकेशसोबतचे काही फोटो सोशल मीडियावर व्हायरल झाले तेव्हा या प्रकरणाचा तपास सुरू होता.

फोटोंमध्ये दोघांमध्ये घट्ट नाते दिसत होते. मात्र, अभिनेत्री जॅकलीनने सुकेशशी कोणतेही संबंध नसल्याचे सांगितले होते. सुकेशच्या कोणत्याही कामात त्याच्यासोबत नव्हती, असेही म्हटले होते. त्याचवेळी सुकेशने ईडीला सांगितले की, दोघेही एकमेकांना डेट करीत होते.