अरेरे! प्रमोशनची इतकी घाई की जान्हवीला कारमध्येच बदलावे लागले कपडे 

दिवंगत अभिनेत्री श्रीदेवी यांची मुलगी जान्हवी कपूरचा 'रुही' हा चित्रपट आज (११ मार्च) प्रदर्शित झाला. गेल्या काही दिवसांपासून जान्हवी या चित्रपटाच्या प्रमोशनमध्ये व्यग्र आहे. यासाठी जान्हवीला एकाच दिवशी वेगवेगळ्या ठिकाणी जावं लागत होतं. या व्यग्र वेळापत्रकामुळे तिला कपडे बदलण्यासाठीही वेळ मिळत नव्हता. म्हणून एका कार्यक्रमाला जाण्यापूर्वी तिने कारमध्येच कपडे बदलण्याचा निर्णय घेतला. 'अत्यंत आरामदायी दिवस होता' असं उपरोधिक कॅप्शन देत जान्हवीने तिच्या इन्स्टाग्राम अकाऊंटवर काही फोटो पोस्ट केले आहेत. 

जान्हवीने पोस्ट केलेल्या पहिल्या दोन फोटोंमध्ये ती कार्यक्रमांसाठी पोझ देताना दिसतेय. तर तिसऱ्या फोटोमध्ये ती कारमध्येच कपडे बदलताना पाहायला मिळतेय आणि चौथा फोटो तिने विमानात बसलेला पोस्ट केला आहे. 

जान्हवीचा 'रुही' हा चित्रपट हॉरर कॉमेडी असून यामध्ये तिच्यासोबत राजकुमार राव आणि वरुण शर्मा मुख्य भूमिका साकारत आहेत. हार्दिक मेहता यांनी या चित्रपटाचं दिग्दर्शन केलं आहे. जान्हवीने 'धडक' या चित्रपटातून बॉलिवूडमध्ये पदार्पण केलं. नागराज मंजुळे दिग्दर्शित 'सैराट'चा हा हिंदी रिमेक होता. याआधी तिचा 'गुंजन सक्सेना' हा चित्रपट ओटीटी प्लॅटफॉर्मवर प्रदर्शित झाला होता. या चित्रपटातील तिच्या अभिनयाला प्रेक्षक-समीक्षकांकडून संमिश्र प्रतिसाद मिळाला होता. आता 'रुही'ला बॉक्स ऑफिसवर कसा प्रतिसाद मिळतो, हे पाहणं औत्सुक्याचं ठरणार आहे.