शूटिंगदरम्यान जॉन अब्राहमला दुखापत; पोस्ट केला व्हिडीओ

अभिनेता जॉन अब्राहमला शूटिंगदरम्यान जबर मार लागला आहे. त्याच्या आगामी 'अटॅक' या चित्रपटाची शूटिंग सुरू होती. या चित्रपटातील एका अॅक्शन सीनच्या शूटिंगदरम्यान जॉनवर काचेच्या रॉडने हल्ला करण्यात येणार होता. ऐनवेळी तो रॉड जॉनच्या चेहऱ्याला लागला आणि रक्त येऊ लागलं. या शूटिंगचा फोटो आणि त्यानंतरचा व्हिडीओ जॉनने सोशल मीडियावर पोस्ट केला आहे. 

या फोटोमध्ये सहकलाकार जॉनच्या पाठीवर काचेच्या रॉडने मारताना दिसत आहे. तर नंतरच्या व्हिडीओमध्ये सेटवरील क्रू मेंबर जॉनची जखम पुसताना पाहायला मिळत आहे. 'कशी सुरुवात झाली आणि आता काय सुरू आहे. ही सर्व गंमत मला आवडतेय', असं कॅप्शन जॉनने या फोटो व व्हिडीओला दिलं आहे. 

हेही वाचा : 'एम. एस. धोनी'मध्ये सुशांतसोबत काम केलेल्या अभिनेत्याचा संशयास्पद मृत्यू

अटॅक या चित्रपटात जॉनसोबत जॅकलिन फर्नांडिस आणि रकुल प्रीत सिंह यांच्याही मुख्य भूमिका आहेत. लक्ष्य राज आनंद यांनी या चित्रपटाचं दिग्दर्शन व लेखन केलं आहे. दिग्दर्शक म्हणून त्यांचा हा पहिलाच चित्रपट आहे. येत्या १५ ऑगस्ट रोजी हा चित्रपट प्रदर्शित होणार आहे. या चित्रपटाची निर्मिती स्वत: जॉनच करत आहे. 

हेही वाचा : दिया मिर्झाची नव्याने सुरुवात; पाहा लग्नसोहळ्यातील खास क्षण

जॉनच्या हातात इतरही काही चित्रपट आहेत. 'पठाण', 'एक व्हिलन रिटर्न्स', 'मुंबई सागा' आणि 'सत्यमेव जयते २' हे त्याचे चित्रपट आगामी काळात प्रेक्षकांच्या भेटीला येणार आहेत. अटॅकच्या शूटिंगपूर्वी जॉनने 'सत्यमेव जयते २' या चित्रपटाचं शूटिंग पूर्ण केलं. २०१८ मध्ये प्रदर्शित झालेल्या 'सत्यमेव जयते' या चित्रपटाचा हा सीक्वेल असून यामध्ये मनोज वाजपेयी आणि दिव्या खोसला कुमार यांच्याही भूमिका आहेत. तर संजय गुप्ता दिग्दर्शित 'मुंबई सागा' चित्रपटात इम्रान हाश्मी, काजल अगरवाल, सुनील शेट्टी, प्रतीक बब्बर, रोहित रॉय, गुलशन ग्रोवर आणि महेश मांजरेकर अशी कलाकारांची मोठी फौजच आहे.