'घटस्फोट झाला म्हणून महिलेनं जीव द्यावा का?'; ट्रोलरला काम्या पंजाबीचा सवाल

घटस्फोट आणि दुसऱ्या लग्नाबाबत टीका करणाऱ्या नेटकऱ्याची अभिनेत्री काम्या पंजाबीने Kamya Panjabi चांगलीच शाळा घेतली. काम्याने ट्विटरवर तिच्या सणसणीत उत्तराचा स्क्रीनशॉट पोस्ट केला आहे. गेल्या वर्षी फेब्रुवारीमध्ये काम्याने शलभ दंगशी दुसरं लग्न केलं. महिला सशक्तीकरणाबद्दलचा एक व्हिडीओ तिने सोशल मीडियावर पोस्ट केला होता. तिच्या या व्हिडीओवर कमेंट करत एका नेटकऱ्याने घटस्फोट आणि दुसऱ्या लग्नावरून टीका केली. 'स्वत:चं पहिलं लग्न तर टिकवू शकली नाही आणि आता दुसरं लग्न केलं, हद्दच आहे', अशी कमेंट संबंधित ट्रोलरने केली.

काम्याचं उत्तर-

'मग काय झालं? मला खुश राहण्याचा किंवा जगण्याचा हक्क नाही का? घटस्फोटा झाला तर महिलेनं जीव द्यावा का? घटस्फोटानंतर महिलेचं आयुष्य तिथेच संपतं का? तुमच्यासारखे विचार करणाऱ्यांच्याविरोधात आता प्रत्येक मुलीने आवाज उठवला पाहिजे आणि अनेकजणी आवाज उठवतसुद्धा आहेत. मला कमजोर समजू नका, लडकी हूँ लड सकती हूँ', अशा शब्दांत काम्याने ट्रोलरला सडेतोड उत्तर दिलं.

काम्याने व्यावसायिक बंटी नेगीशी लग्न केलं होतं. दहा वर्षांच्या संसारानंतर या दोघांनी २०१३ मध्ये घटस्फोट घेतला. काम्या आणि बंटी यांना आरा ही मुलगी आहे. घटस्फोटाच्या सात वर्षांनंतर काम्याने शलभशी लग्न केलं. या लग्नानंतर तिला अनेकदा टीकांचा सामना करावा लागला होता. याविषयी ती 'हिंदुस्तान टाइम्स'ला दिलेल्या मुलाखतीत म्हणाली होती, "घटस्फोट हा शब्दच खूप त्रासदायक आहे. देव करो तो कोणाच्याही आयुष्य न येवो. मात्र आपल्या समाजातील अनेक लोक घटस्फोटीत महिलेवर टीका करतात. एखाद्या महिलेला जर घटस्फोटानंतर पुन्हा नव्याने आयुष्याची सुरुवात करायची असेल तर तिच्याकडे चुकीच्या नजरेनं पाहिलं जातं. तिला साथ दिली जात नाही."