मराठी अभिनेत्री किशोरी शहाणे मुलाच्या चिंतेत काकुळतीला आल्यात

अभिनय क्षेत्रात जवळ-जवळ ३५ वर्ष काम करुनही अभिनेत्री किशोरी शहाणे(Kishori Shahane) यांना आजही या क्षेत्राविषयी अनेक गोष्टी खटकत आहेत. खरंतर किशोरी शहाणे यांनी केवळ मराठीत नाही तर हिंदी सिनेमा,मालिकांमध्येही काम करुन आपलं नाव कमावलं आहे.आजही त्या हिंदी मालिकांमध्ये कार्यरत आहेत. त्यांच्या कुंटुंबाचं तसं पहायला गेलं तर बॉलीवूडशी जवळचं कनेक्शन आहे. पण असं असलं तरी किशोरी शहाणे यांचं बॉलीवूड बद्दल फारसं चांगलं मत नाही. त्यांनी आपल्या एका मुलाखतीत बॉलीवूडमधील 'नेपोटिझम'चा उल्लेख करीत खंत व्यक्त केली आहे. आपल्या मुलामध्ये अभिनयासाठी गरजेचे असणारे सगळे गुण आहेत,त्याचे लूक्स आहेत तरी अद्याप त्याला ब्रेक मिळालेला नाही,तो स्ट्रगल करतोय अशी खंत त्यांनी बोलून दाखवली आहे.

किशोरी शहाणे यांचं सासर हे बॉलीवूडच्या अगदी जवळचं. म्हणजे त्यांचे पती दीपक बलराज हे बॉलीवूडचे दिग्दर्शक. त्यांचा उल्लेख करत त्या आपल्या मुलाखतीत म्हणाल्या की,''माझ्या पतीनं बाबा सेहगल,रोनित रॉय,अली असगर अशा त्यावेळी नव्यानं अभिनय क्षेत्रात येऊ पहाणाऱ्या न्यू कमर्सना संधी दिली होती,जे पुढे जाऊन स्टार झाले. पण आज तसं होताना दिसत नाही. आणि त्यामुळे बॉलीवूडमध्ये करिअर करणं खूप कठीण होऊन बसलंय''. किशोरी शहाणे यांचा २५ वर्षीय मुलगा बॉबी(Bobby Vij) याला सिनेक्षेत्रात करिअर करायचं आहे. पण त्याला अद्याप हवा तसा ब्रेक मिळालेला नाही.

आपल्या मुलाविषयी बोलताना त्या म्हणाल्या, ''माझा मुलगा लहान असल्यापासून थिएटरमध्ये काम करीत आहे.आम्हाला वाटलं त्याचं काम पाहिल्यावर काम नक्की मिळेल. जर आम्ही इतकी वर्ष इंडस्ट्रीला दिली आहेत तर आमच्या मुलाला काम नक्की मिळायला हवं. तो सगळ्याच बाबतीत निपुण आहे. आणि त्याच्या मधील टॅलेंटवर आम्हाला विश्वास आहे. तो ज्यांच्या ज्यांच्याकडे कामासाठी गेला आहे,ते तासन तास त्याच्यासोबत बोलतात पण पुढे काहीच घडत नाही. गोष्ट तिथेच थांबते. टॅलेंट पाहून काम द्या,आमच्या नावावर काम देऊ नका,पण संधी द्या'', असं काकुळतीला येऊन किशोरी शहाणे बोलल्या आहेत.