'लागीरं झालं जी' मालिकेतील अभिनेत्याचं कार अपघातात निधन

'लागीरं झालं जी' (Lagira Zala Ji) या मालिकेतील अभिनेते ज्ञानेश माने (Dnyanesh Mane) यांचं अपघाती निधन झालं. ज्ञानेश हे रोटी घाटातून प्रवास करताना त्यांच्या वाहनाचा अपघात झाला. अपघातानंतर त्यांना पुण्याच्या ससून रुग्णालयात उपचारासाठी दाखल करण्यात आलं होतं. मात्र उपचारादरम्यान १४ जानेवारी रोजी त्यांची प्राणज्योत मालवली. त्यांच्या निधनाने कलाविश्वात दु:खाचा डोंगर कोसळला आहे. ज्ञानेश हे पेशाने डॉक्टर होते. अभिनयाची आवड असल्याने ते मालिकेत काम करत होते. ते बारामतीतील झारगडवाडी इथले होते. त्यांच्या पश्चात पत्नी, दोन भाऊ, भावजया असा परिवार आहे. (Lagira Zala Ji Actor Dnyanesh Mane Passed Away)

'लागीरं झालं जी' या मालिकेत त्यांनी महत्त्वपूर्ण भूमिका साकारली होती. याशिवाय त्यांनी सोलापूर गँगवॉर, काळुबाईच्या नावानं चांगभलं, अंबुज, हंबर्डा, पळशीची पीटी यांसारख्या चित्रपटांमध्ये भूमिका साकारल्या होत्या. 'लागीरं झालं जी' या मालिकेत त्यांनी नितीश चव्हाणसोबत सैन्य अधिकाऱ्याची भूमिका साकारली होती. ज्ञानेश यांचा नितीशसोबतचा फोटो सोशल मीडियावर व्हायरल होत आहे.

अभिनय क्षेत्रात कारकिर्द गाजवत असतानाच त्यांनी डॉक्टरकीची सेवादेखील केली. सोलापूर गँगवॉर या चित्रपटात काम करत असताना त्यांच्या आईच्या निधनाची बातमी त्यांना समजली. त्याच दिवशी गावी जाऊन आईला अखेरचा निरोप देऊन ते पुन्हा शूटिंगसाठी हजर झाले होते. कामाप्रती असलेली त्यांची निष्ठा पाहून सेटवरील कलाकारसुद्धा अचंबित झाले होते. ज्ञानेश यांच्या निधनानंतर संपूर्ण कलाविश्वातून हळहळ व्यक्त होत आहे.