अक्षयच्या 'बेल बॉटम'मध्ये लारा दत्ताला ओळखलंत का? प्रेक्षकांना केलं चकीत!

बॉलिवूडचा खिलाडी अर्थात अभिनेता अक्षय कुमारचा (akshay kumar) आगामी चित्रपट बेल बॉटमबद्दल (bell bottom) प्रेक्षक उत्सुक आहेत. या चित्रपटाचा ट्रेलर प्रदर्शित झाल्यानंतर सर्वांचे लक्ष वेधले गेले ते इंदिरा गांधी यांच्या भूमिकेने. या चित्रपटामध्ये अभिनेत्री लारा दत्ताने (lara dutta) देशाच्या माजी पंतप्रधान इंदिरा गांधी (indira gandhi) यांची भूमिका साकारली आहे. ट्रेलरमधील लाराच्या अभिनयामुळे आणि मेक-ओव्हरमुळे अनेक प्रेक्षकांनी तिला ओळखलेच नाही. नुकत्याच एका मुलाखतीमध्ये लाराने ही भूमिका साकारताना आलेला अनुभव चाहत्यांसोबत शेअर केला आहे.

मुलाखतीमध्ये लारा म्हणाली, 'मी ही भूमिका साकारत आहे हे समजण्याआधीच जर कोणी हे ओळखले असते तर मी त्या व्यक्तीच्या संपूर्ण कुटुंबाला हा चित्रपट मोफत दाखवला असता. होय, ट्रेलरमधील इंदिरा गांधींची भूमिका साकारणारी अभिनेत्री मी आहे. मी या चित्रपटाची स्क्रिप्ट देखील वाचली नव्हती. मला एक कॉल आला आणि त्यांनी मला सांगितले की तू इंदिरा गांधी यांची भूमिका साकारत आहेस. पण हे खरं आहे की तुमच्यावर खूप जबाबदारी असते जेव्हा तुम्ही अशा थोर व्यक्तीची भूमिका साकारता. '

पुढे लाराने सांगितले, 'मला इंदिरा गांधी यांची भूमिका साकारताना खूप संशोधन आणि अभ्यास करावा लागला. पण मला खूप मजा आली. माझ्यासाठी ही अशी संधी होती, ज्यासाठी मी आयुष्यभर कृतज्ञ राहीन.' बेल बॉटममध्ये लारासोबत अक्षय कुमार, वाणी कपूर आणु हुमा कुरेशी हे कलाकार प्रमुख भूमिकेत दिसणार आहेत.

बेल बॉटम या चित्रपटाचे दिग्दर्शन रणजित एम तिवारी यांनी केले आहे. वाशु भगनानी, जॅकी भगनानी, दीपशिखा देशमुख, मोनिषा अडवाणी, मधु भोजवानी आणि निखिल अडवाणी यासर्वांनी या चित्रपटाची निर्मिती केली. हा चित्रपट 19 ऑगस्टला प्रदर्शित होणार आहे.