स्वानंदी बेर्डे आता होणार सौ. माने; नव्या प्रवासाला सुरुवात

मराठी सिनेसृष्टीतील विनोदाचे सम्राट म्हणून ओळखले जाणारे दिवंगत अभिनेते लक्ष्मीकांत बेर्डे यांची मुलगी लवकरच एका नव्या प्रवासाला सुरुवात करतेय. स्वानंदी बेर्डे नाटकात पदार्पण करत असून तिच्या पहिल्याच नाटकाची घोषणा करण्यात आली आहे. 'धनंजय माने इथंच राहतात..' असं या नाटकाचं नाव असून यामध्ये स्वानंदी सौ. मानेंच्या भूमिकेतून नाट्यरसिकांच्या भेटीला येणार आहे. स्वानंदीने तिच्या इन्स्टाग्राम अकाऊंटवर फोटो पोस्ट करत ही आनंदाची बातमी चाहत्यांना सांगितली आहे. 

लक्ष्मीकांत बेर्डे यांनीसुद्धा नाटकातूनच करिअरची सुरुवात केली होती. त्यांच्याकडून विनोदाचं टायमिंग शिकण्यासारखं आहे, असं स्वानंदीने 'मुंबई तक'ला दिलेल्या मुलाखतीत सांगितलं. 'श्री आणि सौ. माने.. माझ्या या नवीन प्रवासासाठी मी खूपच उत्सुक आहे आणि हा आनंद तुमच्यासमोर शेअर करतेय. नवीन नाटक 'धनंजय माने इथंच राहतात' लवकरच तुमच्या भेटीला घेऊन येतोय,' अशी पोस्ट स्वानंदीने लिहिली आहे. यासोबतच तिने नाटकाच्या पटकथेसोबत फोटो पोस्ट केले आहेत.  

हेही वाचा : गँगस्टर अरुण गवळी होणार आजोबा; मुलीच्या घरी लवकरच हळणार पाळणा

हेही वाचा : आस्ताद-स्वप्नालीच्या रजिस्टर मॅरेजचा थाटच निराळा! 

'धनंजय माने इथेच राहतात का', हा लक्ष्मीकांत बेर्डे, अशोक सराफ आणि सचिन पिळगावकर यांच्या 'अशी ही बनवाबनवी' या चित्रपटातील गाजलेला संवाद आहे. याच नावाचं नाटक येत्या मार्च महिन्यात नाट्यरसिकांच्या भेटीला येतंय. राजेश देशपांडे या नाटकाचं दिग्दर्शन करत असून यामध्ये स्वानंदीसोबतच तिची आई व अभिनेत्री प्रिया बेर्डेसुद्धा प्रमुख भूमिकेत आहेत.