Video:आता झोप उडणार !सावध रहा.!! मुक्ता बर्वेचा बहुचर्चित 'Y' चा टीझर रिलीज

मुक्ता बर्वेने(Mukta Barve) हातात मशाल धरलेले 'Y' या चित्रपटाचे आगळेवेगळे असे पोस्टर काही दिवसांपूर्वीच प्रदर्शित करण्यात आले. मशाल घेऊन नक्की ती कोणासोबत लढत आहे याचे विविध अंदाज अजूनही लावले जात आहेत. आता 'Y' चित्रपटाचा टीझरही प्रेक्षकांच्या भेटीला आला आहे. अजित सूर्यकांत वाडीकर दिग्दर्शित 'Y' २४ जून रोजी सर्वत्र प्रदर्शित होत आहे. मुक्ता बर्वे म्हणजे मराठी अभिनयसृष्टीला गवसलेला एक हिराच म्हणावा लागेल. तिनं आजपर्यत मालिका,नाटक,सिनेमा अशा सगळ्याच प्लॅटफॉर्मवर साकारलेल्या भूमिकांनी रसिकांच्या काळजाला थेट हात घातला आहे. त्यामुळे तिच्या सिनेमाची चर्चा तर होणारच. पण 'Y' या तिच्या आगामी सिनेमाचा टीझर मात्र खूप वेगळे संकेत देत आहे,उत्सुकता वाढवताना दिसतोय.(Mukta Barve 'Y' Movie Trailer Release)

अतिशय थरारक अशा या टीझरमध्ये झोपेतून अचानक जागे झालेल्या मुक्ताच्या दिशेने एक अक्राळविक्राळ कुत्रा गुरगुरत झेपावताना दिसत आहे. हा कुत्रा मुक्ताकडे का झेपावत आहे? नक्की काय घडतंय? कशासाठी घडतंय? अर्थात या सर्व प्रश्नांची उत्तरे प्रेक्षकांना चित्रपट पाहिल्यावर मिळणार आहेतच.

कंट्रोल एन प्रॉडक्शन्स निर्मित चित्रपटाची कथा अजित सूर्यकांत वाडीकर यांची असून पटकथा व संवाद अजित वाडीकर, स्वप्नील सोज्वळ व संदीप दंडवते यांनी लिहिलेले आहेत. तर कार्यकारी निर्माते विराज विनय मुनोत आहेत.