शेतकरी आंदोलनावर नसीरुद्दीन शाह म्हणाले, "खामोश रहना.."

"जेव्हा सर्वकाही उध्वस्त झालेलं असेल तेव्हा तुम्हाला शत्रूंचा गोंगाट ऐकू येणार नाही, पण तुमच्या मनाला मित्रांचं मौन सर्वांत जास्त अस्वस्थ करेल. गप्प राहणं म्हणजे अन्याय करणाऱ्यांची बाजू घेणं", अशा शब्दांत ज्येष्ठ अभिनेते नसीरुद्दीन शाह यांनी शेतकरी आंदोलनावर मत व्यक्त केलं. दिल्लीच्या सीमेवर गेल्या दोन महिन्यांपासून शेतकऱ्यांचं आंदोलन सुरु आहे. गेल्या दोन दिवसांपासून सोशल मीडियावर अनेक सेलिब्रिटी या आंदोलनावर व्यक्त होऊ लागले. त्यातच आता नसीरुद्दीन शाह यांची एक मुलाखत व्हायरल होत आहे. या मुलाखतीत त्यांनी शेतकरी आंदोलनाला पाठिंबा दिला. 

जमील गुलरेज यांना दिलेल्या मुलाखतीत नसीरुद्दीन म्हणाले, "माझ्यावर काहीच परिणाम होत नाहीये, असं म्हणून चालणार नाही. कडाक्याच्या थंडीत बसलेल्या शेतकऱ्यांना पाहून मला काही फरक पडत नाही असं बोलू शकत नाही. हे आंदोलन आणखी वाढेल आणि यात सामान्य जनतासुद्धा सहभागी होईल. मौन बाळगणं म्हणजे अन्याय करणाऱ्यांची बाजू घेणं होय."

हेही वाचा : 'यापुढे मालिकांमध्ये करणार नाही काम'; 'ये रिश्ता क्या कहलाता है' मधल्या अभिनेत्रीची घोषणा  

बॉलिवूड कलाकारांनाही सुनावलं
शेतकरी आंदोलनाबाबत मौन बाळगणाऱ्या बॉलिवूड कलाकारांनाही नसीरुद्दीन यांनी सुनावलं. "आमच्या चित्रपटसृष्टीतील मोठमोठे कलाकार यावेळी गप्प बसले आहेत कारण त्यांना काहीतरी गमावण्याची भीती आहे. तुमच्या सात पिढ्या बसून जेवू शकतात इतका पैसा जर तुम्ही कमावला आहात तर आता अजून काय गमावणार तुम्ही" असा परखड सवाल त्यांनी केला.