गर्भवती नीना यांना समलैंगिकाशी लग्न करण्याचा दिला होता सल्ला

अभिनेत्री नीना गुप्ता Neena Gupta यांचं 'सच कहूँ तो' हे आत्मचरित्र सध्या जोरदार चर्चेत आहे. कारण या आत्मचरित्रात नीना यांनी त्यांच्या करिअर आणि खासगी आयुष्याविषयी बरेच धक्कादायक खुलासे केले आहेत. लग्न न करता गरोदर राहिल्यामुळे नीना यांना बऱ्याच समस्यांना सामोरं जावं लागलं होतं. वेस्ट इंडिजचा माजी क्रिकेटपटू विवियन रिचर्ड्सच्या Vivian Richards प्रेमात त्या पडल्या होत्या. मात्र नीना गर्भवती राहिल्यानंतर विवियनने त्याची पत्नी आणि कुटुंबाला सोडणार नसल्याचं स्पष्ट केलं. नीना यांनी मुलगी मसाबाला Masaba Gupta जन्म दिला आणि तिचं संगोपन एकटीनेच केलं. मात्र गर्भवती असताना नीना यांना कोणकोणत्या समस्यांना सामोरं जावं लागलं, त्याबद्दल त्यांनी आत्मचरित्रात लिहिलं आहे. नीना या गरोदर असताना त्यांच्या एका मित्राने मुंबईतील समलैंगिक व्यक्तीशी लग्न करण्याचा सल्ला त्यांना दिला होता. (Neena gupta friend tried to get her married to a gay man when she was pregnant)

सामाजिक आयुष्यातील ताणातून मुक्त होण्यासाठी संबंधित समलैंगिक व्यक्तीला लग्न करायचं होतं, असं सुजॉय मित्राने नीना यांना सांगितलं. लग्नानंतर त्या व्यक्तीने नीना यांच्या मुलीचा स्वीकार केला असता, मात्र नीना आणि त्यांच्या कुटुंबापासून ती व्यक्ती लांबच राहणार होती.

'मी त्यांच्यासमोर जोरात हसले. कारण फक्त वादविवाद टाळण्यासाठी लग्न करावं, हे मला पटत नव्हतं. मला अत्यंत कठीण प्रश्नांची उत्तरं द्यावी लागणार आहेत, हे मला ठाऊक होतं. त्यातही अभिनेत्री असल्याने माझ्याविषयी अनेक तर्कवितर्क लावले जात होते. पण जेव्हा वेळ येईल तेव्हा त्या गोष्टींना मी सामोरं जाईन, असं मनाशी पक्कं केलं होतं. तोपर्यंत सैल कपडे वापरून गरोदर असल्याची बातमी मी लपवणार होते', असं नीना 'झूम'ला दिलेल्या मुलाखतीत म्हणाल्या.

अभिनेते सतीश कौशिक यांनीसुद्धा नीना यांना लग्नाची मागणी घातली होती, असा खुलासा या आत्मचरित्रात करण्यात आला आहे. नीना गर्भवती असताना सतीश कौशिक यांनी त्यांना लग्नाची मागणी घातली होती, असं त्यात लिहिलं आहे.