'लागीरं झालं जी' फेम शिवानी बावकर नव्या भूमिकेत

सोनी मराठी वाहिनीवर 'कुसुम' Kusum ही नवी मालिका लवकरच प्रेक्षकांच्या भेटीला येणार आहे. नुकताच या मालिकेचा प्रोमो सोशल मीडियावर पोस्ट करण्यात आला. 'लागीरं झालं जी' या मालिकेत भूमिका साकारून घराघरात पोहोचलेली अभिनेत्री शिवानी बावकर Shivani Baokar या मालिकेत मुख्य भूमिकेत दिसणार आहे. 'शीतली' या व्यक्तिरेखेमुळे तिला खूप लोकप्रियता मिळाली. आता सासर आणि माहेर अशा दोन्ही घरातील जबाबदाऱ्या पार पाडणाऱ्या मुलीच्या भूमिकेत शिवानी दिसणार आहे.

लोकलमध्ये तिची मैत्रीण तिला संध्याकाळी मिसळ पार्टी करण्याबद्दल विचारते, तेव्हा 'बाबांना दवाखान्यात घेऊन जायचं आहे', असं ती सांगते. त्यावर 'अजूनही तूच करतेस त्या घरचं?' असं तिची मैत्रीण विचारते. त्यावर कुसुम तिला विचारते की, 'सासर जोडायला माहेरची नाळ तोडायची गरज आहे का?' अनेक मुलींच्या मनातला प्रश्न तिने यात बोलून दाखवला आहे. कुसुम असं तिच्या भूमिकेचं आणि नव्या मालिकेचं नाव आहे.

शिवानीने शितलीची भूमिका साकारत अनेकांच्या मनात घर केलं. मालिकेतील तिचा अनोखा अंदाज प्रेक्षकांच्या मनावर जादू करत होता. मालिकेनंतर तिचा म्युझिक व्हिडीओसुद्धा प्रदर्शित झाला.