Onkar Bhojane: 'हास्यजत्रा' फेम ओंकार भोजनेची गाडी सुसाट..आता थेट महेश मांजरेकरांच्या गोटात वर्णी

Onkar Bhojane: महाराष्ट्राची हास्यजत्रा या कार्यक्रमातून प्रकाशझोतात आलेला एक चेहरा म्हणजे ओंकार भोजने. या शो मध्ये असताना त्याला जेवढी लोकप्रियता मिळाली नसेल त्याहून दुप्पट लोकप्रियता त्याला शो सोडल्यावर मिळाली. ओंकारनं हास्यजत्रा सोडलं आणि रातोरात ती बातमी व्हायरल झाली.

कारण तोवर ओंकारनं झी मराठीवरचा फु बाई फु या प्रसिद्ध कार्यक्रमाच्या नव्या सिझनची ऑफर स्विकारली अशी चर्चा रंगली होती.

यावर अद्याप ओंकारनं तोंडातून एकही शब्द काढला नसला तरी अनेक प्रकारे यामागची कारणं समोर आलीत निर्माते-दिग्दर्शकांशी स्कीटवरनं बिनसलं,सहकलाकारांशी फाटलं..तर कुणी म्हटलं 'झी'नं मोठं मानधन देऊन खिशात टाकलं.(Onkar Bhojane Maharashtrachi Hasyajatra actor entry in mahesh manjrekar new project drama)

असो...आता हास्यजत्रा सोडली..फु बाई फु बंद पडलं असं असलं तरी ओंकारची गाडी सुसाट धावतेय..थेट मांजरेकरांच्या गोटात त्याची वर्णी लागल्याची बातमी आहे बरं का. आणि एकदा का मांजरेकरांचा वरदहस्त लाभला की मोठे प्रोजेक्ट सहज चालत येतात ही मराठी इंडस्ट्रीची परंपराच आहे.

तर,चला जाणून घेऊया नेमकं मांजरेकरांच्या कोणत्या कलाकृतीमध्ये ओंकार दिसणार आहे.

तर महेश मांजरेकर आणि नाट्यनिर्माते राहुल भंडारे मिळून 'करुन गेलो गाव' हे नाटक पुन्हा रंगमंचावर घेऊन येत आहेत. यामध्ये ओंकार भाऊ कदमच्या साथीनं अभिनयाची सुसाट बॅंटिग करताना दिसणार आहे.

'करुन गेलो गाव' या नाटकाविषयी थोडक्यात सांगायचं तर हे मालवणी भाषेतलं नाटक आहे. आणि मालवणी भाषेतील नाटकांनी एक काळ गाजवला आहे हे वेगळं सांगायला नकोच.

त्यात कॉलेज जीवनात ओंकारनं एकांकिका गाजवल्यात त्यामुळे आता भाऊ कदमच्या साथीनं या नाटकातही तो भाव खाऊन जाणार हे नक्की. 'करुन गेलो गाव' या नाटकाचे लेखन-दिग्दर्शन राजेश देशपांडे यांनी केले आहे.

तसं पाहिलं तर हास्यजत्रा सोडल्यानंतर ओंकार काही ऐकत नाही हे स्पष्ट दिसून आलं आहे. त्यानं 'सरला एक कोटी' हा सिनेमा केलाय ज्याला प्रदर्शनानंतर लोकांचा चांगला प्रतिसाद मिळताना दिसला तर काही हिंदी प्रोजेक्टमध्येही त्याची वर्णी लागली आहे.