Oscars 2022 : भारताचा स्वप्नभंग; भारताच्या 'रायटिंग विथ फायर' ला मागे टाकत 'समर ऑफ सोल' विजयी..

चित्रपट विश्वातील लक्षवेधी आणि सर्वोच्च पुरस्कार म्हणून गौरवल्या जाणाऱ्या ऑस्कर पुरस्काराचे ९४ वे पर्व आज २८ मार्च रोजी लॉस एंजेलिस येथील डॉल्बी थिएटर मध्ये मोठ्या उत्साहात पार पडला. यंदाचे वर्ष भारतीयांसाठी अत्यंत महत्वाचे होते. कारण 'रायटिंग विथ फायर’ या भारतीय माहितीपटाला सर्वोत्कृष्ट माहितीपटाचे नामांकन मिळाले होते. या गोष्टीचा अभिमान असला तरी या आनंदावर विरजण पडले आहे. कारण भारताच्या 'रायटिंग विथ फायर' ला मागे टाकून 'समर ऑफ सोल' सर्वोत्कृष्ट माहितीपट ठरला आहे.

'ऑस्कर' पुरस्काराचे नामांकन मिळणे ही देखील देशासाठी मोठी अभिमानास्पद गोष्ट आहे. यंदा ऑस्करच्या स्पर्धेत भारताचा माहितीपट दाखल झाला होता. सर्वोत्कृष्ट माहितीपटासाठी भारताकडून नामांकन मिळालेला हा पहिला माहितीपट होता. आशय आणि विषयाचे वेगळेपण जपलेला हा माहितीपट विजयी होऊन भारतात परतेल अशी आशा सर्व भारतीयांना होती परंतु सर्वोच्च पुरस्कारापासून भारत मागे आल्याने अनेकजण हताश झाले आहेत.

'रायटिंग विथ फायर' या माहितीपटाची निर्मिती चित्रपट निर्माते- दिग्दर्शक रिंटू थॉमस आणि सुष्मित घोष यांनी केली होती. बुंदेलखंडमध्ये स्वतःचे वृत्तपत्र 'खबर लहरिया' चालवणाऱ्या उद्यमशील आणि धाडसी दलित महिलांची कथा आणि व्यथा त्यांनी या माहितीपटात मांडली होती. भारताच्या माहितीपटाचा विजय झाला नसला तरी नामांकन मिळणे ही देखील गौरवाची बाब असल्याचे म्हणत भारतीय 'रायटिंग विथ फायर' वर कौतकाचा वर्षाव करत आहेत.

'आम्हाला खूप आनंद झाला आहे. आमच्यासाठी आणि भारतीय सिनेमासाठी हा एक मोठा क्षण आहे. एखाद्या भारतीय माहितीपटाला अकादमी पुरस्कारासाठी नामांकन मिळण्याची ही पहिलीच वेळ आहे, त्यामुळे इतिहास रचला आहे. हा चित्रपट निर्भय दलित महिला पत्रकारांबद्दल आहे. ही आधुनिक भारतीय स्त्रीची कथा आहे,' अशी प्रतिक्रिया नामांकन मिळाल्या नंतर 'रायटिंग विथ फायर' चे दिग्दर्शक निर्माते सुष्मित घोष यांनी माध्यमांना दिली होती.