लशीचा पहिला डोस घेतल्यानंतर परेश रावल यांना कोरोना

ज्येष्ठ अभिनेते परेश रावल यांना कोरोनाची लागण झाली आहे. शुक्रवारी रात्री ट्विट करत त्यांनी चाहत्यांना याबद्दलची माहिती दिली. परेश रावल यांनी काही दिवसांपूर्वीच कोरोना प्रतिबंधक लसीचा पहिला डोस घेतला होता. 'दुर्दैवाने, मला कोरोनाची लागण झाली असून गेल्या दहा दिवसांत माझ्या संपर्कात आलेल्यांनी कृपया कोरोना चाचणी करून घ्यावी', असं ट्विट त्यांनी केलं. अनुपम खेर, रणवीर शौरी, राहुल ढोलकिया यांसह अनेक कलाकारांनी परेश रावल यांना काळजी घेण्याचं आवाहन केलं आहे. राज्यात कोरोना प्रादुर्भाव पुन्हा मोठ्या प्रमाणावर वाढत असून याआधी आमिर खान, आर. माधवन, कार्तिक आर्यन, मनोज वाजपेयी, सतीश कौशिक, रोहित सराफ या कलाकारांनाही कोरोनाची लागण झाली आहे. 

९ मार्च रोजी परेश रावल यांनी लशीचा पहिला डोस घेतला होता. त्यावेळी फोटो पोस्ट करत त्यांनी याबद्दल ट्विटरवर सांगितलं होतं. आता पहिला डोस घेतल्यानंतर १८ दिवसांतच त्यांना कोरोनाची लागण झाली आहे. राज्यात गेल्या काही दिवसांपासून कोरोना महासाथीची दुसरी लाट आली असून दररोज बाधितांचा आकडा वाढत आहे. लोकांनी कोरोना प्रतिबंधाचे नियम पाळले नाहीत तर नाइलाजाने अधिक कठोर निर्बंध लागू करावे लागणार, असा इशारा मुख्यमंत्री उद्धव ठाकरे यांनी दिला आहे. 

हेही वाचा : ..म्हणून अरुणा इराणी यांनी घेतला आई न होण्याचा निर्णय

परेश रावल हे शर्मनजी नमकीन या चित्रपटासाठी शूटिंग करत होते. कोरोनावर मात केल्यानंतर ते पुन्हा एकदा काम सुरू करतील. या चित्रपटात आधी दिवंगत अभिनेते ऋषी कपूर भूमिका साकारत होते. मात्र त्यांच्या निधनानंतर परेश रावल यांची निवड करण्यात आली. रितेश सिधवानी आणि फरहान अख्तर निर्मित या चित्रपटाचं दिग्दर्शन हितेश भाटिया करत आहेत.