''आर्यन खान प्रकरणात २५ कोटींची डील'', धक्कादायक व्हिडिओ आला समोर

मुंबई : आर्यन खान ड्रग्स (aryan khan drugs case) प्रकरणातील एक साक्षीदार किरण गोसावीच्या सहकाऱ्याचा एक व्हिडिओ व्हायरल झाला आहे. यामध्ये त्यांनी एनसीबीचे अधिकारी समीर वानखेडे (NCB officer samir wankhede) यांच्यावर गंभीर आरोप केले आहे. या प्रकरणात एनसीबीने त्यांना खोट्या पंचनाम्यावर सही करायला लावली होती, असा आरोप प्रभाकर साईल यांनी केला आहे. तसेच हे प्रकरण दाबण्यासाठी 25 कोटी रुपयांमध्ये डील केल्याचा आरोप केला आहे.

प्रभाकर साईल हा गोसावीचा बॉडीगार्ड म्हणून काम करत असल्याचे सांगतोय. तो म्हणतो, ''क्रूझवर झालेल्या छापेमारीवेळी तो किरण गोसावीसोबत होता. त्याने सॅम आणि गोसावी नावाच्या व्यक्तीला एनसीबी कार्यालयाजवळ भेटताना पाहिलं. एनसीबीने आर्यनला ताब्यात घेतल्यानंतर शाहरुखची मॅनेजर पूजा ददलानी किरण गोसावी आणि सॅम नावाची व्यक्ती भेटली. हे प्रकरण दाबण्यासाठी २५ कोटी रुपयांमध्ये डील झाली होती. त्यापैकी ८ कोटी रुपये समीर वानखेडे सरांना द्यायचे आहे आणि उरलेले आपल्याला वाटून घ्यायचे आहेत, असे किरण गोसावी फोनवर बोलत होते. निळ्या मर्सिडीज कार मध्ये त्याची बोलणी झाली. त्यानंतर किरण गोसावींनी एका ठिकाणाहून मला ५० लाख रुपये घ्यायला पाठविले होते. ते पैसे मी त्यांना आणून दिले. त्यानंतर त्यांनी माझ्याकडे एक पिशवी देऊन ती सॅमला द्यायला सांगितली होती. त्यानंतर किरण गोसावी स्वतः पत्नीसोबत बाहेर गेले होते.'' असे खळबळजनक आरोप या व्हिडिओमधून केले आहेत. मात्र, सकाळ या व्हिडिओची पुष्टी करत नाही.

''किरण गोसावी 27 सप्टेंबरला अहमदाबादला गेला होता. तेथून येऊन तो मुंबईत NCB अधिकाऱ्यांना भेटला. गोसावीने सॅम नावाच्या व्यक्तीला 38 लाख देण्यास बॉडीगार्ड प्रभाकरला सांगितले होते. त्या दिवसानंतर गोसावी गायब असल्याने आपल्या जीवाला धोका असल्याची भीती'' प्रभाकरने व्यक्त केली आहे.