हेलिकॉप्टर प्रवास आणि बरंच काही.. रसिका सुनीलचं फिल्मी प्रपोजल

आपल्या प्रियकराने अगदी स्वप्नवत प्रपोज करावं असं प्रत्येक मुलीला वाटत असतं. तर प्रेयसीला प्रपोज करण्यासाठी मुलांकडूनही अनेक प्रयत्न केले जातात. 'माझ्या नवऱ्याची बायको' या मालिकेत शनायाची भूमिका साकारून घराघरात पोहोचलेली अभिनेत्री रसिका सुनील हिचा बॉयफ्रेंड आदित्य बिलागीने तिला खूश करण्यासाठी सर्वांत अनोखी कल्पना अंमलात आणली. आदित्यचं फिल्मी स्टाइल प्रपोजल पाहून केवळ रसिकाच नाही तर तिचे चाहतेसुद्धा भारावले. रसिकाने सोशल मीडियावर या प्रपोजलचे फोटो आणि व्हिडीओ पोस्ट केले आहेत. आदित्यने मला सरप्राइज ड्रीम प्रपोजल भेट म्हणून दिली असून आयुष्यभर मी ते विसरू शकणार नाही, असं म्हणत रसिकाने त्या खास दिवसाविषयी सांगितलं. 

लॉस एंजिलिसमध्ये रसिका आणि आदित्यची पहिल्यांदा भेट झाली आणि तिथेच या दोघांमध्ये प्रेमाची कळी उमलली. हेच शहर हेलिकॉप्टर प्रवासाद्वारे पाहण्याची योजना आदित्यने प्रपोजलच्या दिवशी केली होती. ज्या ठिकाणी आदित्य आणि रसिका मित्र म्हणून सर्वांत आधी फिरायला गेले होते, त्या मालिबू या ठिकाणी आदित्यने तिला प्रपोज केलं. निरभ्र आकाश आणि पर्वतांच्या साक्षीने आदित्यने गुडघ्यावर बसून रसिकाला प्रपोज केलं, 'तू माझ्याशी लग्न करशील का?' आदित्य विचारण्याआधीच रसिकाचा त्याला होकार होता आणि ज्याप्रकारे त्याने प्रपोजल खास करण्यासाठी प्रयत्न केले, ते पाहून ती पुन्हा त्याच्या प्रेमात पडली. 

रसिकाने नवीन वर्षाच्या पहिल्याच दिवशी आदित्यसोबतचा फोटो पोस्ट करत त्याला डेट करत असल्याचं चाहत्यांना सांगितलं होतं.  ‘दो हजार एक किस.. सर्वांना नवीन वर्षाच्या शुभेच्छा. २०२० या वर्षभरात अनेक वाईट घडामोडी घडल्या असल्या तरी कृतज्ञ राहण्यासाठी या वर्षाने अनेक कारणं दिली आहेत’, असं कॅप्शन देत तिने आदित्यसोबतचे फोटो पोस्ट केले होते. दोन वर्षांपूर्वी ती मालिका सोडून लॉस एंजिलिस याठिकाणी पुढील शिक्षणासाठी गेली होती. तिथेच तिची आदित्यशी भेट झाली.