"रिअ‍ॅलिटी शोच्या विजेत्यांना नंतर कामच मिळत नाही" | Madhuri Pawa | Sakal
sakal

बोलून बातमी शोधा

Actress Madhuri Pawar

"रिअ‍ॅलिटी शोच्या विजेत्यांना नंतर कामच मिळत नाही"

'अप्सरा आली' (Apsara Ali) या रिअ‍ॅलिटी शोची विजेती आणि टीव्ही अभिनेत्री माधुरी पवार (Madhuri Pawar) हिने नुकत्याच दिलेल्या एका मुलाखतीत तिच्या प्रवासाविषयी सांगितलं. माधुरीने 'देवमाणूस' या मालिकेत भूमिका साकारली. मात्र रिअ‍ॅलिटी शोनंतर काम मिळवणं किती कठीण होतं याविषयी ती व्यक्त झाली. माधुरीने एमबीएचं शिक्षण पूर्ण केलं आहे. किंबहुना एमबीए करणारी ती तिच्या कुटुंबातील एकमेव मुलगी आहे. लहानपणापासूनच तिला अभ्यासासोबतच डान्स आणि अभिनयात खूप रस असल्याचं तिने सांगितलं.

'ई टाइम्स'ला दिलेल्या मुलाखतीत माधुरी म्हणाली, "महाराष्ट्राचा सुपर डान्सर या टीव्ही शोसाठी मी ऑडिशन दिलं होतं. हा अत्यंत लोकप्रिय शो होता. ऑडीशनमध्ये माझ्या नृत्यकौशल्याने परीक्षक प्रभावित झाले होते, मात्र माझ्याकडे सांगण्यासाठी कोणतीच कथा नसल्याने त्यांनी मला नाकारलं. सध्या शोचे निर्माते हे प्रतिभेपेक्षा अशा कथांमागे का धावतात तेच मला कळत नाही. हा सर्व टीआरपीचा खेळ आहे. पण अशा खेळामुळे अनेकांना चांगली संधी मिळत नाही."

हेही वाचा: नाद खुळा! 'पुष्पा'मधल्या 'श्रीवल्ली' गाण्याचं मराठमोळं व्हर्जन

माधुरीने 'अप्सरा आली' या रिअ‍ॅलिटी शोचं विजेतेपद पटकावलं. मात्र हा शो जिंकल्यानंतर खऱ्या प्रवासाला सुरुवात झाली. "जेव्हा शो सुरू होता, तेव्हा मी २४ तास काम करत होते. अनेक कार्यक्रमांमध्ये हजेरी लावली होती. मात्र शो संपल्यानंतर ते सर्व संपलं. रिअ‍ॅलिटी शो जिंकल्यानंतर प्रसिद्धी मिळते पण अशा विजेत्यांना नंतर काम मिळत नाही. ही गोष्ट मला खरी वाटते. हा माझा स्वत:चा अनुभव आहे. विजेत्याची क्रेझ ही फक्त दोन ते तीन महिनेच टिकते आणि त्यानंतर सर्वजण त्याला विसरतात. मराठी टीव्हीवरील अनेक असे विजेते आहेत, मात्र आता ते कुठे आहेत? काय करत आहेत? अनेकजण त्यापैकी कामाच्या शोधात असतील आणि हेच सध्याचं कटू सत्य आहे", अशी खंत तिने व्यक्त केली.

काम मिळत नसल्याने माधुरी नैराश्यात गेली होती. "मला काहीच काम मिळत नव्हतं. मी नैराश्यात गेले होते. सोशल मीडियावर मी अधिकाधिक व्हिडीओ बनवू लागले आणि नैराश्यातून बाहेर पडण्यासाठी तेच माझ्या कामी आलं. रातोरात मी सोशल मीडिया स्टार झाले", असं तिने सांगितलं. माधुरीने 'देवमाणूस' या मालिकेत चंदाची भूमिका साकारली. ही भूमिका छोटी असली तरी त्यामुळे तिला चांगली प्रसिद्धी मिळाली.

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :Entertainment
loading image
go to top