रुपाली भोसले अडकणार लग्नबंधनात? पोस्ट केला मंगळसूत्राचा फोटो

'बिग बॉस मराठी' फेम आणि सध्या 'आई कुठे काय करते' मालिकेत भूमिका साकारणारी अभिनेत्री रुपाली भोसले सध्या सोशल मीडियावर चर्चेत आहे. सोशल मीडियावर रुपालीच्या लग्नाची चर्चा रंगली आहे. या चर्चेमागचं कारणही तसंच आहे. रुपालीने तिच्या इन्स्टा स्टोरीमध्ये चक्क मंगळसूत्राचा फोटो पोस्ट केला होता आणि 'अखेर.. हे घडतंय' असं कॅप्शन लिहिलं होतं. या फोटो आणि कॅप्शनमुळेच रुपाली लग्नबंधनात अडकतेय की काय, असा प्रश्न चाहत्यांमध्ये उपस्थित झाला आहे. रुपाली अंकित मगरे या चित्रपट निर्मात्याला डेट करतेय. अंकितसोबतचे फोटो ती सोशल मीडियावर सतत शेअर करत असते आणि अनेकदा तिने मोकळेपणाने तिचं प्रेमसुद्धा व्यक्त केलं आहे. त्यामुळे अंकित आणि रुपाली लग्नाची तयारी करत असल्याची चर्चा सुरु झाली. 

सोशल मीडियावर पोस्ट केलेला मंगळसूत्राचा फोटो पाहून अनेक मित्रमैत्रिणींनीही रुपालीला फोन करण्यास सुरूवात केली. अखेर ती याबद्दल नुकत्याच दिलेल्या एका मुलाखतीत व्यक्त झाली. "मी पोस्ट केलेला मंगळसूत्राचा फोटो आणि त्याला दिलेलं कॅप्शन सोशल मीडियावर वाऱ्याच्या वेगाने व्हायरल झालं. मला सर्वांना हेच सांगायचं आहे की, होय माझ्या घरी लवकरच सनई-चौघडे वाजणार आहेत. पण ते माझ्या लग्नाचे नसून माझा भाऊ संकेतच्या लग्नासाठी असेल. माझा भाऊ लग्नबंधनाच अडकण्यास सज्ज झाला असून त्यासाठी जोरदार शॉपिंग सुरू आहे. वहिनीसाठी नुकतीच आम्ही मंगळसूत्राची खरेदी केली आणि त्याचाच फोटो मी सोशल मीडियावर पोस्ट केला होता", असं रुपाली 'ई टाइम्स'ला दिलेल्या मुलाखतीत म्हणाली.  

हेही वाचा : रणबीरनंतर आता आलिया भट्टलाही कोरोना

भावाविषयी सांगताना ती पुढे म्हणाली, "माझा भाऊ संकेत अत्यंत कठीण परिस्थितीतून पुढे आला आहे. काही वर्षांपूर्वीच त्याचा अपघात झाला होता. त्यानंतर तो भावनिक आणि मानसिकदृष्ट्या फार खचला होता. काम आणि भविष्याची चिंता त्याला सतावत होती. पण अखेर आता त्याच्या आयुष्यात आनंदाचे क्षण येणार आहेत. त्यामुळे त्याच्यासाठी आणि आमच्या संपूर्ण कुटुंबीयांसाठी तो दिवस फार महत्त्वाचा आहे."