'मन दुखावलं, पण..'; भारतीय महिला हॉकी संघाचं शाहरुखकडून कौतुक

टोकियो ऑलिम्पिक Tokyo Olympics स्पर्धेत भारतीय महिला हॉकी Indian women's hockey team संघाला ऐतिहासिक कामगिरी करण्यात अपयश आलं. ब्रिटनच्या संघाने भारतीय महिला संघाला ४-३ ने पराभूत करत कांस्य पदकावर आपलं नाव कोरलं. पहिल्या क्वार्टरमध्ये ग्रेट ब्रिटनने आपला धमाका दाखवला आणि भारतीय महिला संघाला 2-0 असे पिछाडीवर टाकले. पण दुसऱ्या क्वार्टरमध्ये भारतीय महिला संघाने आपल्यातील ताकद दाखवून दिली. या क्वार्टरमध्ये भारतीय महिला संघाने तीन गोल डागले. अखेरच्या क्वार्टरमधील गोलच्या जोरावर ग्रेट ब्रिटनने 4-3 असा विजय मिळविला. पदक मिळाले नसले तरी भारतीय महिला संघाच्या कामगिरीचं अनेकांनी कौतुक केलं. अभिनेता शाहरुख खानने Shah Rukh Khan संघासाठी ट्विट केलं आहे. शाहरुखचा हॉकी या खेळावर 'चक दे इंडिया' (chak de india) नावाचा चित्रपट प्रदर्शित झाला होता. त्यात त्यानं कबीर खान नावाच्या प्रशिक्षकाची भूमिका साकारली होती.

शाहरुखचं ट्विट-

'मन दुखावलं; पण अभिमानाने मान उंचावण्यासाठी अनेक कारणं आहेत. भारतीय महिला हॉकी संघाने चांगली कामगिरी केली. तुम्ही भारतातील प्रत्येक व्यक्तीला प्रेरणा दिली. हाच एक विजय आहे', असं शाहरुखने लिहिलं.

याआधीही शाहरुखने भारतीय महिला हॉकी संघासाठी ट्विट केलं होतं. प्रशिक्षक शॉर्ड मारिनचं कौतुक करत त्याने त्यांची तुलना 'चक दे इंडिया'मधील कबीर खानशी केली होती. त्यानंतर किंग खानचं हे ट्विट मोठ्या प्रमाणात व्हायरल झालं होतं.

पराभवानंतर खेळाडूंना अश्रू अनावर

या सामन्यातील पराभवानंतर भारतीय महिला संघातील खेळाडूंना अश्रू अनावर झाल्याचे पाहायला मिळाले. ग्रेट ब्रिटनच्या आक्रमण लिलया पेलणाऱ्या सविता पुनियाला मैदानातच रडू कोसळले. तिच्याशिवाय इतर महिला खेळाडूंनाही पराभवानंतर अश्रू अनावर झाल्याचे पाहायला मिळाले. प्रतिस्पर्धी संघातील खेळाडू भारतीय महिला खेळाडूंचे सांत्वन करतानाचे चित्रही दिसले.