शाहरुखच्या 'मन्नत' बंगल्याची आताची किंमत वाचून तुमचे डोळे विस्फारतील!

मुंबईतील बॉलिवूड कलाकारांचे बंगले हे त्यांच्या चाहत्यांसाठी आकर्षणाचं विषय असतं. परराज्यातून येणारे अनेक चाहते या सेलिब्रिटींची घरं पहायला उत्सुक असतात. मुंबईतील वांद्रे इथं बॉलिवूडचा 'किंग' अर्थात अभिनेता शाहरुख खानचा Shah Rukh Khan 'मन्नत' Mannat हा आलिशान बंगला आहे. त्याचा बंगला पाहण्यासाठी अनेक चाहते तिथं गर्दी करतात. शाहरुख जेव्हा दिल्लीहून मुंबईला आला, तेव्हा त्याच्या खिशात फक्त ३०० रुपये होते. तोच किंग खान आता कोट्यधीश आहे.

जेव्हा शाहरुखने बंगला विकत घेतला त्यावेळी बंगल्याची किंमत जवळपास १३.२ कोटी रुपये इतकी होती. गुजराती व्यावसायिक नरिमन दुबाश यांच्या मालकीचा तो बंगला होता. २००१ मध्ये शाहरुखने बंगल्याच्या मालकाची भेट घेतली आणि बऱ्याच प्रयत्नानंतर अखेर त्याने 'बाई खोर्शिद भानू संजना ट्रस्ट'कडून हा बंगला विकत घेतला. आताच्या घडीला 'मन्नत'ची किंमत ही तब्बल २०० कोटी रुपयांच्या घरात आहे. ६००० चौरस फुटांच्या या बंगल्यात अनेक सोयीसुविधा आहेत. बेडरुम, लिव्हिंग रुम, जिम, खासगी बार, लायब्ररी, प्लेरुम हे सर्वकाही त्यात असून बंगल्याचं इंटेरिअर शाहरुखची पत्नी गौरी खानने केलं आहे.

"येस बॉस चित्रपटाच्या शूटिंगच्या वेळी माझ्या मनात मन्नत हा बंगला विकत घेण्याची इच्छा होती. कारण पाहताचक्षणी तो बंगला माझ्या मनात भरला होता. त्यावेळी त्याला 'विला विएना' नावाने ओळखलं जायचं", असं शाहरुखने एका मुलाखतीत सांगितलं होतं. शाहरुखने विकत घेतल्यानंतरही चार वर्षांसाठी या बंगल्याचं नाव 'विला विएना' असंच होतं. नंतर २००५ मध्ये शाहरुखने बंगल्याचं नाव 'मन्नत' असं ठेवलं. हाच बंगला आता अनेकांसाठी सेल्फी पॉईंट ठरला आहे.