सिद्धार्थ शुक्लाच्या निधनानंतर समोर आला शहनाजचा व्हिडीओ

प्रसिद्ध टीव्ही अभिनेता सिद्धार्थ शुक्लाने Sidharth Shukla २ सप्टेंबर रोजी हृदयविकाराच्या तीव्र झटक्याने निधन झाले. सिद्धार्थच्या निधनाने संपूर्ण कलाविश्वाला मोठा धक्का बसला. सिद्धार्थची मैत्रीण शहनाज गिल Shehnaaz Gill अजूनही त्याच्या मृत्यूच्या धक्क्यातून सावरली नाही. 'सिदनाझ'चे चाहते तिच्याविषयी काळजी व्यक्त करताना दिसतात. अशातच आता पहिल्यांदाच सिद्धार्थच्या निधनानंतर शहनाजचा एक व्हिडीओ सोशल मीडियावर व्हायरल होत आहे. या व्हिडीओमध्ये शहनाजच्या चेहऱ्यावरील दु:ख सहज पहायला मिळत आहे. ती यात एक पंजाबी गाणं गाताना दिसतेय.

व्हिडिओमध्ये 'सिदनाझ'चे चाहते कमेंट्स करत तिला खंबीर राहण्याचा सल्ला देत आहेत. शहनाजचा हा व्हिडीओ नेमका कधीचा आहे हे अद्याप स्पष्ट होऊ शकले नाही. पण हा व्हिडीओ सिद्धार्थच्या निधनानंतरचा असल्याचा अंदाज चाहते व्यक्त करत आहेत. सिद्धार्थच्या निधनानंतर शहनाज पूर्णपणे खचली होती.

अनेक मालिका आणि रिअॅलिटी शोजच्या माध्यमातून सिद्धार्थ प्रेक्षकांच्या भेटीला आला होता. 'बिग बॉस १३'मध्ये सिद्धार्थने भाग घेतला होता आणि या सिझनचा तो विजेता ठरला होता. या सिझनमध्ये अभिनेत्री व गायिका शहनाज गिलसोबत सिद्धार्थची चांगली मैत्री झाली होती. बिग बॉसच्या घरातून बाहेर पडल्यानंतर या दोघांनी विविध कार्यक्रमांना एकत्र हजेरी लावली होती. दोघांचा म्युझिक व्हिडीओसुद्धा प्रदर्शित झाला होता. सिद्धार्थ आणि शहनाज यांच्या मैत्रीची सतत सोशल मीडियावर चर्चा होत असे. 'सिदनाज' असा हॅशटॅग या दोघांच्या चाहत्यांनी तयार केला होता. सिद्धार्थ-शहनाजच्या चाहत्यांमध्ये #sidnazz हा हॅशटॅग प्रसिद्ध आहे.