मृत्यूसंदर्भातील सिद्धार्थचं 'ते' जुनं ट्विट पुन्हा व्हायरल

प्रसिद्ध टिव्ही अभिनेता सिद्धार्थ शुक्लाच्या Sidharth Shukla निधनाच्या काही तासांनंतर त्याचं एक जुनं ट्विट सोशल मीडियावर पुन्हा एकदा व्हायरल होऊ लागलं आहे. सिद्धार्थने २०१७ साली मृत्यूसंदर्भातील एक ट्विट केलं होतं. तेच ट्विट आता पुन्हा एकदा त्याच्या चाहत्यांकडून व्हायरल होत आहे. गुरुवारी सकाळी सिद्धार्थला हृदयविकाराचा तीव्र झटका आला. मुंबईतील कूपर हॉस्पिटलमध्ये दाखल करताच त्याला मृत घोषित करण्यात आले. सिद्धार्थच्या पश्चात आई आणि दोन बहिणी असा कुटुंब आहे.

काय आहे सिद्धार्थचं ट्विट?

'मृत्यू हे आयुष्यातील सर्वात मोठं नुकसान नाही. आयुष्यातील सर्वात मोठं नुकसान म्हणजे जिवंत असताना आपल्या आत एखादी गोष्ट मृत पावणे', असं ट्विट सिद्धार्थने २४ ऑक्टोबर २०१७ रोजी केलं होतं. त्याच्या या ट्विटवर चाहत्यांनी कमेंट्स करत दु:ख व्यक्त केलं आहे.

मॉडेलिंगपासून करिअरची सुरुवात

सिद्धार्थने मॉडेल म्हणून करिअरची सुरुवात केली होती. 'बाबुल का आंगन छुटे ना' या मालिकेतून त्याने छोट्या पडद्यावर पदार्पण केलं होतं. त्यानंतर 'जाने पहचाने से.. ये अजनबी', 'लव्ह यू जिंदगी' यांसारख्या मालिकांमध्ये त्याने भूमिका साकारल्या होत्या. मात्र 'बालिका वधू' या मालिकेतील भूमिकेमुळे तो घराघरात पोहोचला.

बॉलिवूडमध्ये केलं काम

सिद्धार्थने बऱ्याच रिअॅलिटी शोमध्ये भाग घेतला होता. 'झलक दिखला जा ६', 'खतरों के खिलाडी ७' आणि 'बिग बॉस १३' मध्ये तो झळकला होता. 'बिग बॉस ३'चं विजेतेपद त्याने पटकावलं होतं. २०१४ मध्ये सिद्धार्थने करण जोहर निर्मित 'हम्प्टी शर्मा की दुल्हनियाँ' या चित्रपटातून बॉलिवूडमध्ये पदार्पण केलं. यामध्ये त्याने सहाय्यक अभिनेत्याची भूमिका साकारली होती.