Singham Again: ना दीपिका ना कतरिना या प्रसिद्ध टिव्ही अभिनेत्रीची रोहित शेट्टीच्या सिंघममध्ये एंट्री!

गेल्या काही दिवसापासून रोहित शेट्टीच्या कॉप युनिव्हर्सच्या 'सिंघम अगेन' या चित्रपटाची खुप चर्चा होती. सिंघम या चित्रपटाची एक वेगळी आणि तगडी फॅन फॉलोइंग आहे.

रोहित शेट्टी त्याच्या सुपरहिट फ्रँचायझी 'सिंघम' चा तिसरा चित्रपट बनवत आहे. काही दिवसांपुर्वी रोहित शेट्टीने या चित्रपटाच्या स्टारकास्टसोबत शुटिंगचा श्रीगणेशा केला. त्याचे फोटो रोहितने सोशल मीडियावर शेयर केले होते.

अजय देवगण, रणवीर सिंग आणि अक्षय कुमार यांची मुख्य भूमिका असलेल्या 'सिंघम अगेन' चित्रपटात आता एका लोकप्रिय टीव्ही अभिनेत्रीची एंट्री झाली आहे. या अभिनेत्रीचं नाव आहे श्वेता तिवारी.

श्वेता तिवारी हिला वेगळ्या परिचयाची गरज नाही. 'कसौटी जिंदगी के' मालिकेद्वारे ती घराघरात पोहचली. ती बिग बॉस शोची विजेती देखील आहे. तिची लेक पलक तिवारी हिने देखील सलमान खानच्या किसी का भाई किसी की जान या चित्रपटातून बॉलिवूडमध्ये एंट्री केली आहे. आता श्वेता तिवारीही देखील मोठ्या पडद्यावर तिची जादू दाखवण्यासाठी सज्ज झाली आहे.

श्वेता तिवारीने अलीकडेच तिच्या अधिकृत इंस्टाग्राम अकाउंटवर रोहित शेट्टीसोबतचा एक फोटो शेअर केला आहे. यानंतर सिंघम अगेनमध्ये तिची वर्णी लागल्याच्या बातम्या जोर धरु लागल्या आहेत.

श्वेताने नुकतच तिच्या इन्स्टा स्टोरीमध्ये अभिनेता विकास कलंतरीची एक पोस्ट रिशेअर केली आहे. ज्यामध्ये ती रोहित शेट्टीसोबत पोज देताना दिसतेय. या फोटोच्या कॅप्शन त्याने लिहिले आहे की, "आमच्या रॉकस्टार श्वेता तिवारीचं कॉप युनिव्हर्समध्ये स्वागत आहे. सिंघम अगेन." आता या पोस्टद्वारे श्वेता सिंघम अगेन या चित्रपटाचा भाग असणार आहे. याची पुष्टी झाली आहे.

रोहित शेट्टीचा बहुप्रतिक्षित चित्रपट 'सिंघम अगेन'मध्ये तगडी स्टारकास्ट देखील दिसणार आहे. या चित्रपटात अजय देवगण, करीना कपूर, रणवीर सिंग, अक्षय कुमार आणि दीपिका पदुकोण यांच्या प्रमुख भूमिका आहेत.

सिंघम अगेन चित्रपटाची शूटिंग सुरु झाली असून हा चित्रपट ऑगस्ट 2024 मध्ये चित्रपटगृहांमध्ये प्रदर्शित होईल अशी अपेक्षा आहे.