'टार्झन' फेम अभिनेता जो लारा यांचा विमान अपघातात मृत्यू

'टार्झन : द एपिक अँडव्हेंचर्स' Tarzan: The Epic Adventures या चित्रपटातील अभिनेता जो लारा Joe Lara यांच्यासह सात जणांचा विमान अपघातात मृत्यू झाला. या विमानात जो यांच्यासोबत त्यांची पत्नीसुद्धा होती. अमेरिकेच्या नॅशविले शहराजवळील तलावामध्ये त्यांचं विमान कोसळलं आणि या भीषण अपघातात जो लारा यांचा मृत्यू झाला. शनिवारी स्थानिक वेळेनुसार सकाळी ११ वाजता विमानाने फ्लॉरिडाच्या टेमिनी विमानतळावरून उड्डाण केलं. उड्डाणाच्या काही मिनिटांनंतर लगेचच हा अपघात घडला. (Tarzan Actor Joe Lara Among 7 Presumed Dead In US Plane Crash)

अपघातग्रस्त विमान नॅशविलेजवळ असणाऱ्या पर्सी प्रिस्ट तलावात कोसळलं. शनिवारी रात्रीपर्यंत बचावकार्य सुरू होतं. त्यानंतर शनिवारी रात्री उशिरा पीडितांची ओळख पटवण्यात आली.

१९९६ आणि २००० दरम्यान शूट झालेल्या मालिकेतील २२ एपिसोड्समध्ये जो लाराने मुख्य भूमिका साकारली होती. त्यानंतर 'टार्झन इन मॅनहॅटन' या चित्रपटातही ते मुख्य भूमिकेत होते. 'स्टील फ्रंटीअर', 'सनसेट हीट', 'गनस्मोक : द लास्ट अपॅचे', 'अमेरिकन सायबर्ग : स्टील वॉरिअर', 'द मॅग्निफिशियंट सेव्हन', 'बेवॉच' आणि 'ट्रॉपिकल हीट' यांसारख्या चित्रपटांतही त्यांनी काम केलंय.