अरमान कोहली ड्रग्ज प्रकरणात पुरता फसला,कोर्टानं पुन्हा फेटाळला जामीन

ड्रग्ज प्रकरणात अभिनेता अरमान कोहलीचा(Armaan Kohli) जामीन अर्ज एकदा पुन्हा कोर्टानं फेटाळला आहे. गेल्या वर्षी ऑगस्ट महिन्यात अरमान कोहलीकडे १.२ ग्राम कोकिन सापडल्यानं त्याला अटक करण्यात आली होती. त्याच्या घरावर छापा टाकून तपासात ड्रग्ज सापडलं होतं. आता एनडीपीएस कोर्टानं त्याचा जामिन अर्ज पुन्हा एकदा फेटाळला आहे.

विशेष कोर्टानं जामिन अर्ज रद्द करताना सांगितलं,''अरमान कोहलीनं सह-आरोपीसोबत मिळून ड्रग्ज सेवन करण्यासोबतच त्याची तस्करीही केल्याचं प्राथमिक पातळीवर चौकशीनंतर निदर्शनास आलं आहे. कमी ड्रग्ज सापडलं असलं तरी ते सापडणं आणि त्याचे धोके लक्षात घेता हे गंभीर प्रकरणात मोडतं. त्यामुळे याआधारावरच जामिन अर्ज रद्द केला जात आहे''. याचबरोबर अरमान कोहलीच्या मोबाईलमध्ये काही अशा गोष्टी हाती लागल्या आहेत ज्या अभिनेत्या विरोधातील पुरावे म्हणून कोर्टात सादर करण्यात आल्या आणि त्या सर्व गोष्टी कोर्टाच्या सुपूर्द करण्यात आल्या आहेत.

अरमान कोहली मुंबईच्या आर्थर रोड जेलमध्ये गेल्या वर्षीपासून कैदेत आहे. अरमान कोहली शेवटचा सलमानच्या 'प्रेम रतन धन पायो' या सिनेमात दिसला होता. तसंच 'जानी दुश्मन: एक अनोखी कहानी' आणि 'एलओसी कारगिल' या सिनेमातही त्यानं काम केलेलं आहे. तसंच,बिग बॉसमध्येही त्यानं सहभाग घेतला होता. त्यावेळी काजोलची बहिण तनिशा मुखर्जीसोबत त्याच्या अफेअरच्या चर्चा रंगल्या होत्या. अरमान कोहली गेले ९ महिने जेलमध्ये कैदेत आहेत आणि त्यानंतर त्यानं अनेकदा जामिनासाठी अर्ज केला आहे.