"करण जोहरचं होतं माझ्यावर प्रेम"; अभिनेत्रीचा खुलासा 

चित्रपटसृष्टीत असे अनेक कलाकार आहेत, जे एकमेकांना लहानपणापासून किंवा शालेय जीवनापासून ओळखतात. काहींमध्ये घट्ट मैत्री झाली तर काहींच्या नात्यात प्रेमाची कळी उमलली. एकतर्फी प्रेमाचेही बरेच किस्से इंडस्ट्रीत ऐकायला मिळतात. असाच एका किस्सा समोर आला आहे. प्रसिद्ध निर्माता-दिग्दर्शक करण जोहरने एका अभिनेत्रीला प्रेमाची कबुली दिली होती. त्या अभिनेत्रीने एका मुलाखतीत या गोष्टीचा खुलासा केला. ती अभिनेत्री आहे ट्विंकल खन्ना. करण आणि ट्विंकल एकमेकांना लहानपणापासूनच ओळखतात आणि आताही या दोघांमध्ये खूप चांगली मैत्री आहे. मात्र एकेकाळी करण ट्विंकलच्या प्रेमात होता आणि त्याने स्वत:हून तिच्याकडे प्रेमाची कबुली दिली होती. 

२०१५ मध्ये ट्विंकलच्या पहिल्या पुस्तकाचा अनावरण सोहळा पार पडला होता. त्यावेळी ट्विंकलने करणविषयी सांगितलं होतं. करणचं माझ्यावर प्रेम होतं, असं ती म्हणाली. त्याला करणनेही दुजोरा दिला. या मुलाखतीत ट्विंकलने करणच्या बोर्डिंग स्कूलमधलाही किस्सा सांगितला. करणने एकदा बोर्डिंग स्कूलमधून पळून जाण्याचा प्रयत्न केला होता. पण गेटच्या बाहेर पडण्याआधीच त्याला पकडलं गेलं होतं, असं तिने सांगितलं. 

'कुछ कुछ होता है' हा दिग्दर्शक म्हणून करण जोहरचा पहिलाच चित्रपट होता. या पहिल्या चित्रपटातील टीनाच्या भूमिकेसाठी त्याला ट्विंकल खन्नाला घ्यायचं होतं. मात्र ट्विंकलने नकार दिल्यामुळे ती भूमिका अभिनेत्री राणी मुखर्जीला मिळाली. करणचा हा पहिलाच चित्रपट ब्लॉकबस्टर ठरला. आजही या चित्रपटाची क्रेझ पाहायला मिळते.