बालरक्षक रोखणार शाळाबाह्य मुले 

संदीप लांडगे
Saturday, 31 October 2020

शिक्षण विभाग राबविणार ‘एक गाव एक बालरक्षक’ मोहीम 

औरंगाबाद : आरटीआय कायद्यानुसार ६ ते १४ वयोगटातील प्रत्येक बालकाला नियमित शिक्षण मिळणे आवश्यक आहे. सध्या कोरोनाच्या पार्श्वभूमीवर पालकांचे मोठ्या प्रमाणात स्थलांतर होत आहे. त्यामुळे विद्यार्थी शाळाबाह्य होण्याची शक्यता वाढली आहे. विद्यार्थ्यांचे पालकांसोबतचे स्थलांतर रोखण्यासाठी राज्यात ‘एक गाव एक बालरक्षक’ मोहीम राबविण्यात येणार आहे. 

 

मराठवाड्यातील अन्य बातम्या वाचण्यासाठी यावर क्लिक करा..!

दरवर्षी ऊसतोड, वीटभट्टीच्या कामासाठी अनेक पालक परजिल्ह्यात स्थलांतर करतात. त्यांच्या मुलांना शिक्षणाच्या प्रवाहात ठेवण्यासाठी जिल्ह्यात विविध ठिकाणी हंगामी वसतिगृहे स्थापन केली जातात; तसेच प्रत्येक गावपातळीवर तसेच तालुक्यात ‘बालरक्षक’ मोहीम राबविण्यात येते. या मोहिमेअंतर्गत स्थलांतर होणाऱ्या विद्यार्थ्यांचा शोध घेतला जातो. या विद्यार्थ्यांच्या शिक्षणासह राहण्याची, जेवणाची सर्व सुविधा केली जाते. 

औरंगाबाद जिल्ह्यातील महत्त्वाच्या बातम्या वाचण्यासाठी येथे क्लिक करा.

मागील वर्षी जिल्ह्यात राबविण्यात आलेल्या बालरक्षक मोहिमेला मोठे यश आले होते. याअंतर्गत जिल्ह्यातील पैठण व कन्नडला प्रत्येकी सहा तसेच सोयगाव, फुलंब्री आणि वैजापूर तालुक्यात प्रत्येकी एक असे १५ हंगामी वसतिगृह स्थापन करण्यात आले होते. यात सुमारे तीन हजार ३८० विद्यार्थ्यांचे स्थलांतर रोखण्यात शिक्षण विभागाला यश आले होते. यंदा कोरोनामुळे आरोग्यविषयक गंभीर समस्या निर्माण झाली आहे. परिणामी, राज्यातील सर्व शाळा बंद आहेत. कोरोनामुळे रोजगाराची समस्या वाढल्याने गावातील मजुरी करणाऱ्यांचे स्थलांतरदेखील वाढले आहे. या पालकांसोबत जाणाऱ्या विद्यार्थ्यांचे स्थलांतर रोखण्यासाठी ‘एक गाव एक बालरक्षक’ मोहीम शासनाने हाती घेतली आहे. 

देशभरातील महत्त्वाच्या बातम्या वाचण्यासाठी येथे क्लिक करा.

अशी आहे मोहीम 

  • कोणत्याही एका शिक्षकाची बालरक्षक म्हणून समितीने नियुक्ती करावी 
  • बालरक्षकाचे नाव शाळा व ग्रामपंचायतीच्या दर्शनी भागावर लावावे 
  • सर्व बालकांना पाठ्यपुस्तके मिळतील, असे प्रयत्न करावेत 
  •  कोरोना काळात मुलांना ऑनलाइन, ऑफलाइन पद्धतीने शिक्षण द्यावे 
  •  विद्यार्थ्यांच्या शारीरिक, मानसिक, भावनिक संतुलनावर लक्ष ठेवणे 
  •  बालरक्षकांनी अनियमित व शाळाबाह्य मुलांची माहिती घेऊन पाठपुरावा 

(संपादन-प्रताप अवचार)


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Childcare prevent out of school children Aurangabad news