उस्मानाबाद : वाळूमाफियाने घातला तहसीलदाराच्या अंगावर ट्रॅक्टर, प्रकृती गंभीर

परंडा (जि. उस्मानाबाद) - शहरालगत असलेल्या भोत्रा रस्त्यावर सिना नदीपात्रातून अवैधरीत्या वाळुमाफिया वाळूचा बेसुमार उपसा करीत असल्याची माहिती मिळाल्यानंतर कारवाईसाठी गेलेल्या तहसीलदार अनिलकुमार हेळकर यांच्या अंगावर वाळूमाफियाने ट्रॅक्टर घातला. यात श्री. हेळकर गंभीर जखमी झाले. हा धक्कादायक प्रकार आज (ता. 14) पहाटे पाचच्या सुमारास घडला. या प्रकरणी ट्रॅक्टरचालकास पोलिसांनी ताब्यात घेतले आहे. 

याबाबत माहिती अशी की, सध्या शहर व तालुका परिसरात असलेल्या नदीपात्रातून मागील काही दिवसांपासून वाळूमाफियांकडून बेसुमार अवैधरीत्या वाळू उपसा सुरू आहे. यापूर्वी अशा बेकायदा वाहनावर महसूल विभागाने कारवाई केली आहे. आज पहाटे बेकायदा वाळूचोरी होत असल्याची माहिती मिळाल्याने तहसीलदार हेळकर यांनी तलाठी चंद्रकांत कसाब, आशीष ठाकूर, आकाश बाबळे या महसूल कर्मचाऱ्यांना सोबत घेऊन भोत्रा रस्त्यावर जात असताना अण्णा खडके यांच्या खडी केंद्रावर वाळूने भरलेले ट्रॅक्टर दिसून आले. कारवाईचा बडगा उगारण्यासाठी तहसीलदार हेळकर हे ट्रॅक्टरजवळ जात वाहनाच्या चावीची मागणी करीत असताना ट्रॅक्टरचालक मयूर बापूसाहेब वाघमारे (रा. माळी गल्ली, परंडा) याने तहसीलदार हेळकर यांच्या अंगावर ट्रॅक्टर घातला. 

हेही वाचा -  Exclusive : पुण्याचा पोलिस देऊ शकतो निर्भयाच्या बलात्काऱ्यांना फाशी 

पाठीवरून गेले मोठे चाक
ट्रॅक्टरचे मोठे चाक तहसीलदार हेळकर यांच्या पाठीवरूनच गेल्याने ते गंभीर जखमी झाले. त्यांना उपचारासाठी बार्शीला हलवण्यात आले आहे. या घटनेची माहिती मिळताच पोलिस निरीक्षक इक्बाल सय्यद, सहायक पोलिस निरीक्षक रावसाहेब राठोड हे पोलिस कर्मचाऱ्यांसह घटनास्थळी दाखल झाले. गंभीर जखमी असलेल्या तहसीलदार हेळकर यांना तत्काळ उपचारासाठी बार्शी येथील रुग्णालयात हलविण्यात आले.

क्लिक करा - कैद्याला एकदम लटकवत नाहीत फासावर, अशी असते पूर्वतयारी 

पोलिसांनी ट्रॅक्टरचालक मयूर वाघमारे यास ताब्यात घेतले आहे. अन्य वाळुमाफियांची धरपकड सुरू असल्याने सर्वजण फरार झाले आहेत. घटनेतील बिगर क्रमांकाचा ट्रॅक्टर पोलिसांनी ताब्यात घेतला आहे. या घटनेचा पंचनामा करण्यात आला आहे. 

मृत्यूदंड - कसा तयार होतो फाशीचा दोर? काय म्हणतात त्याला...