औरंगाबाद : अतिक्रमण हटावला तीव्र विरोध, नागरिक झोपले ‘जेसीबी’समोर

औरंगाबाद : सिटी चौक ते नौबत दरवाजा रस्ता रुंदीकरण केले जात आहे. यामध्ये किलेअर्क (Kileark) आणि नौबत दरवाजा (Naubat Darwaza)येथील अतिक्रमणे (Encroachment)काढण्यासाठी बुधवारी (ता.१९) सकाळी महापालिकेचे पथक या भागात दाखल झाले. या कारवाईला मोठा विरोध झाला. काही नागरिक ‘जेसीबी’ (JCB) समोर झोपले. तर काही नागरिकांनी घरातील भांडे पथकावर भिरकावल्याने तणाव निर्माण झाला. सिटीचौक पोलीसांनी विरोध करणाऱ्यांना ताब्यात घेतले. त्यानंतर लगेच महापालिकेने कारवाईचा बडगा उगारत तब्बल १२ पेक्षा अधिक मालमत्ता भुईसपाट केल्या.

विरोध करणाऱ्यांना पोलिसांनी घेतले ताब्यात

रस्ते विकास महामंडळातर्फे सीटी चौक ते नौबत दरवाजा रस्त्याचे काम सुरू केले. रस्ता पंचकुंआ कब्रस्तानपर्यंत पूर्ण झाला. पुढे नाल्यावर मोठा पूलही बांधण्यात आला. कब्रस्तान ते नौबत दरवाजापर्यंतची अतिक्रमणे काढणे बाकी होते. ५ जानेवारीरोजी मनपाने १० मालमत्ता जमीनदोस्त केल्या होत्या. उर्वरित मालमत्ताधारकांना वेळ देण्यात आला होता. बुधवारी सकाळी ११ वाजता महापालिकेचे पथक दाखल होताच मालमत्ताधारकांनी कडाडून विरोध दर्शविला. जेसीबीसमोर नागरिक झोपले. घरात असलेल्या नागरिकांनी पथकावर भांडे भिरकावण्यास सुरूवात केली. हा प्रकार पाहुण सिटीचौक पोलीसांनी विरोध करणाऱ्या नागरिकांना ताब्यात घेवून ठाण्यात नेले. प्रकरण निवळताच महापालिकेने पाडापाडी मोहीम सुरू केली. सायंकाळपर्यंत १४ पेक्षा अधिक मालमत्ता पाडण्यात मनपाला यश आले होते. नौबत दरवाजाच्या दोन्ही बाजूने वळण रस्ता तयार करण्यात येणार आहे. दरवाजाच्या दर्शनी भागात सुंदर वाहतूक बेटही स्मार्ट सिटीमार्फत उभारण्यात येणार आहे.

आता मुदत नाही, पर्यायी जागाही नाही

बुधवारी मालमत्ताधारकांनी विरोध करताना आम्हाला पर्यायी जागा द्यावी, अशी मागणी महापालिकेकडे केली. अतिरिक्त आयुक्त रविंद्र निकम यांच्यासह उपस्थित अधिकाऱ्यांनी अशी कोणतीही तरतूद नसल्याचे सांगितले. जागा रिकामी करण्यास वेळ द्या, अशीही मागणी मालमत्ताधारकांनी केली. ५ जानेवारी ते १९ जानेवारी एवढा अवधी दिला होता. आता मुदत मिळणार नाही, असेही यावेळी बजावण्यात आले.