लातूर जिल्ह्यात कोरोनामुळे मृत्यू झालेल्या आकड्यात घोळ सुरुच

लातूर : कोरोना विषाणूचा विळखा घट्ट होत आहे. रुग्णांची संख्या लक्षणीय वाढत आहे. रोज चिता जळत आहेत. असे असताना सरकारी घोळ, नाही कोणाचा मेळ अशी काहीशी परिस्थिती मृतांच्या आकड्याबाबत दिसत आहे. पंधरा दिवसांत आरोग्य विभागाच्या अहवालानुसार जिल्ह्यात ९७ जणांचा मृत्यू झाला तर याच कालावधीत महापालिकेने आपल्या हद्दीत कोरोनामुळे मृत झालेल्या १६१ जणांवर अंत्यसंस्कार केले आहेत; तसेच २७ मृतदेह महापालिकेने संबंधित स्थानिक स्वराज्य संस्थाकडे हस्तांतरित केले आहेत. म्हणजेच १८८ जणांचा मृत्यू झाला आहे.

मृतांच्या बाबतीत आरोग्य विभागाकडून शासनालाही खोटी माहिती दिली जात आहे की काय अशी शंका निर्माण होत आहे. शहरात शासकीय असो किंवा खासगी कोरोना रुग्णालयात एखाद्याचा कोरोनाचा उपचार सुरू असताना मृत्यू झाला तर त्याची माहिती महापालिकेला दिली जाते. महापालिकेचे पथकामार्फत अशा मृतदेहावर कोरोना प्रोटोकॉलनुसार अंत्यसंस्कार केले जात आहेत. याची माहिती पोलिसांनाही दिली जात आहे. यात ता. एक ते पंधरा एप्रिल या पंधरा दिवसांत या पथकाने १६१ जणांवर अंत्यसंस्कार केले आहेत.

२७ मृतदेह हस्तांतरित : ग्रामीण भागातील एखादा रुग्ण येथे उपचार घेताना मरण पावला तर त्याचा मृतदेह संबंधित नगरपरिषद, नगरपंचायत, ग्रामपंचायतीकडे हस्तांतरित केला जात आहे. याकरिता महापालिका संबंधित यंत्रणेकडून हमीपत्र तसेच विनंतीपत्र घेऊन मृतदेह देत आहे. या पंधरा दिवसात महापालिकेने २७ मृतदेह हस्तांतरित केले आहेत.

शासनालाही चुकीची माहिती : काही दिवसांपासून कोरोनामुळे मृत्यू होणाऱ्यांची संख्या वाढत चालली आहे. आरोग्य विभागाच्या वतीने रोज किती रुग्ण वाढले, किती रुग्णांचा मृत्यू झाला, किती जणांच्या आरटीपीसीआर किंवा अँटीजेन टेस्ट झाल्या, किती बेड शिल्लक आहेत, कोणत्या रुग्णालयात किती रुग्ण आहेत याचा अहवाल प्रसिद्धीस दिला जातो. या अहवालानुसार ता. एक एप्रिल ते पंधरा एप्रिल या कालावधीत जिल्ह्यात ९७ जणांचा मृत्यू झाल्याचे दाखवले आहे. दुसरीकडे महापालिकेच्या आकडेवारीनुसार १६१ आणि २७ असे एकूण १८८ जणांचा मृत्यू झाला आहे. त्यामुळे आरोग्य विभागाकडून शासनाला देखील चुकीची माहिती दिली जात आहे की काय अशी शंका येत आहे. त्यामुळे या प्रकाराकडे वरिष्ठांनी लक्ष देण्याची गरज आहे.

आकडे बोलतात....

तारीख/ अहवालातील मृतांची संख्या/ पालिकेने केलेले अंत्यसंस्कार/ हस्तांतरित केलेले मृतदेह

१ एप्रिल------------------७------------------------ ५----------------------------------२

२ एप्रिल-------------------------६------------------------११------------------------१

३ एप्रिल--------------------------१०-----------------------६------------------------२

४ एप्रिल----------------------------५---------------------७-------------------------१

५ एप्रिल---------------------------३-----------------६---------------------------२

६ एप्रिल-----------------------------२--------------११-------------------------००

७ एप्रिल----------------------------८------------१३-----------------------------१

८ एप्रिल-----------------------------४--------------९------------------------------३

९ एप्रिल-----------------------------७--------------११--------------------------२

१० एप्रिल----------------------------३--------------१४-------------------------२

११ एप्रिल----------------------------६--------------६------------------------३

१२ एप्रिल----------------------------०-------------२०------------------------१

१३ एप्रिल----------------------------८----------११----------------------------००

१४ एप्रिल----------------------------१८-----------१५------------------------५

१५ एप्रिल-----------------------------२०--------------१६-------------------------२

------------

एकूण---------------------------------९७----------१६१----------------------२७