Aurangabad: पैठणमध्ये शक्तिप्रदर्शन! CM शिंदेंची पेढ्याने तर भुमरेंची लाडूतुला होणार

मुख्यमंत्री एकनाथ शिंदे यांचा औरंगाबाद दौरा सुरू होण्याआधीच चर्चेत आला आहे. पैसे देऊन लोक बोलावणं, गर्दी करण्यासाठी विशेष आदेश काढणं, अशा अनेक चर्चा या सभेआधी होत होत्या. आता एकनाथ शिंदे यांची पेढेतुला होणार असल्याचंही सांगितलं जात आहे. फक्त शिंदेच नव्हे तर संदिपान भुमरे यांचीही लाडूतुला होणार आहे.

आज दुपारी दोन वाजता मुख्यमंत्री एकनाथ शिंदेंची सभा पैठणमध्ये होणार आहे. त्यापूर्वी त्यांची पेढ्यांनी तुला केली जाणार आहे. तर संदिपान भुमरे यांची लाडूतुला होणार आहे. ठाकरे गटातून बाहेर पडून शिंदे गटात गेलेले संदिपान भुमरे आज पैठणमध्ये शक्तिप्रदर्शन करणार आहेत. या सभेची सध्या जोरदार चर्चा सुरू आहे.

यासाठी १०० किलो पेढे तयार करण्यात आले आहेत. तर संदिपान भुमरे यांच्या तुलेसाठी १०० किलो लाडूही तयार करून ठेवण्यात आले आहेत. हे लाडू आणि पेढे तयार करण्यासाठी सहा तास लागले आहेत. लाडू आणि पेढ्यांसाठी दोन्हीसाठी प्रत्येकी १७ हजार रुपये खर्च आला आहे. या पेढ्यांसाठी ७० किलो खवा वापरण्यात आला आहे. या आधी आदित्य ठाकरेही औरंगाबाद दौऱ्यावर आले होते. त्यांना प्रतिशह देण्यासाठी भुमरे यांनी या सभेचं आयोजन केलं आहे. पहिल्यांदाच मुख्यमंत्री औरंगाबाद मध्ये येत आहेत.