उमेदवारी नाकारल्याने पंकजा मुंडेंच्या समर्थकांचा राडा; पोलिसांची धरपकड

औरंगाबाद : सध्या विधानपरिषदेच्या निवडणुकासांठी रणधुमाळी चालू असताना पंकजा मुंडे यांच्या समर्थकांनी औरंगाबादेत राडा केला आहे. विधानपरिषदेसाठी भाजपने आपले पाच उमेदवार उभे केले आहेत. त्यामध्ये पंकजा मुंडे (Pankaja Munde) यांना वगळण्यात आलं आहे त्यामुळे समर्थकांनी नाराजी व्यक्त केली आहे. दरम्यान त्यांनी औरंगाबादेच्या भाजप (BJP) कार्यालयावर मोर्चा काढत आंदोलन केलं आहे. काही कार्यकर्त्यांना पोलिसांनी ताब्यात घेतलं असल्याची माहिती आहे.

(Pankaja Munde Suporters Protest At Aurangabad)

दरम्यान भाजपने पंकजा मुंडे यांची उमेदवारी नाकारल्याने जळगावमध्येही आंदोलन करण्यात आलं होतं. त्यानंतर आता औरंगाबादमध्ये कार्यकर्त्यांनी भाजपच्या कार्यालयावर आंदोलन करत भाजपविरोधात घोषणाबाजी केली आहे. पंकजा मुंडे यांना सातत्याने डावललं जातंय असं मत समर्थकांनी व्यक्त केलं आहे.

"भाजपने पंकजा मुंडे यांना उमेदवारी दिली नाही, तर आता येत्या निवडणुकांत ओबीसी समाज भाजपला उत्तर देणार आहे." असं मत समर्थकांनी व्यक्त केलं आहे. त्यानंतर पोलिसांनी समर्थकांना ताब्यात घेतलं आहे. दरम्यान परभणीतही सोशल मीडियावर पंकजा मुंडे यांची उमेदवारी नाकारल्यावरून पोस्टरबाजी करण्यात आली आहे.

पोलिसांनी कार्यकर्त्यांची धरपकड सुरू केली असून यासंदर्भात २ दिवस कोणतीच भूमिका माध्यमांसमोर मांडणार नसल्याचं पंकजा मुंडे यांनी सांगितलं आहे.