Parbhani Crime | धक्कादायक ! परभणीत वृद्ध जोडप्याचा निर्घृण खून

ताडकळस (जि.परभणी) : येथून जवळच असलेल्या असोला (ता.परभणी) येथे एका वृध्द दाम्पत्याचा निर्घृण हत्या करण्यात आल्याची धक्कादायक घटना बुधवारी (ता.१६) सकाळी उघडकीस आली. दरम्यान या घटनेत अन्य एक महिला गंभीर जखमी असून तिच्यावर नांदेड येथील रुग्णालयात उपचार सुरु आहेत. परभणी (Parbhani) तालुक्यातील असोला येथील शंकरराव ग्‍यानोजी रिक्षे (वय ६५) व सारजाबाई शंकरराव रिक्षे हे (वय ६०) हे दोघे रात्री जेवण करून झोपले होते. त्यांच्या समवेत शंकरराव रिक्षे यांची मेहुणी गिरजाबाई गोविंद आडकिने याही मुक्कामी होत्या. आडकिने यांच्यासोबत घरात एक अज्ञात तरुण मुक्कामी होता अशी माहिती पोलिसांनी दिली. (Brutally Aged Couple Killed In Parbhani)

सकाळी शेजारील व्यक्तींनी रिक्षे दाम्पत्य अजून कसे उठले नाहीत म्हणून घराचे दार लोटून पाहिले असता, शंकरराव व सारजाबाई रिक्षे हे दोघे रक्तबंबाळ अवस्थेत आढळून आले. तर गिरजाबाई आडकिने या गंभीर अवस्थेत बाजूला पडलेल्या दिसून आल्या. या घटनेमुळे गावात एकच खळबळ उडाली. ग्रामस्थांनी तातडीने ताडकळस पोलिस ठाण्यात घटनेची माहिती दिली. सहायक पोलीस निरीक्षक विजय रामोड यांच्यासह अन्य कर्मचारी घटनास्थळी धावून आले.

गिरजाबाई आडकिने यांना प्रत्यक्षदर्शींनी परभणी जिल्हा शासकीय रुग्णालयात दाखल केले. तेथून त्यांना नांदेड येथे पुढील उपचारासाठी हलविण्यात आले असल्याची माहिती ग्रामस्थांनी दिली. दरम्यान पोलिसांनी घटनास्थळी श्वानपथक पाठवून तपासणी केली. बुधवारी (ता.१६) दुपारपर्यंत या प्रकरणात कोणतीही नोंद ताडकळस पोलिस ठाण्यात दाखल नव्हती.