Usmanabad ; त्या १५१ सोसायट्यांना प्रशासकांची अडचण

उस्मानाबाद : बाजारसमितीच्या निवडणुकांमध्ये विविध कार्यकारी सेवा संस्थाच्या सदस्याना मतदान करण्याचा अधिकार कायम राहणार आहे. जिल्ह्यात अजुनही १५१ एवढ्या सेवा सोसायट्यावर प्रशासक असल्याने त्या संस्थातील सदस्य निवडणुकीपासून वंचित राहण्याची भीती व्यक्त होत आहे. प्रशासनाच्या पातळीवर या सर्व संस्थाच्या निवडणुका घेण्यासाठी प्रयत्न सुरू असल्याची माहिती जिल्हा उपनिबंधक सुनील शिरापुरकर यांनी ‘सकाळ’शी बोलताना दिली आहे. प्रशासनाकडून असे सांगितले जात असले तरी ठरलेल्या कालावधीत निवडणुका घेण्याचे मोठे आव्हान त्यांच्यासमोर उभ असल्याचे वास्तव आहे.

जिल्ह्यामध्ये ४६९ सेवा सोसायट्यापैकी १५१ संस्थाच्या निवडणुका प्रलंबित आहेत. आता बाजारसमिती निवडणुकीचा संभाव्य कार्यक्रम देखील आला आहे.तरी एवढ्या मोठ्या प्रमाणात संस्थाच्या निवडणुका झालेल्या नाहीत. अशा संस्थाच्या सदस्याना वेळेत निवडणुका नाही झाल्यास त्यांना बाजारसमितीच्या प्रक्रियेपासून दूर रहावे लागणार आहे. शासनाने पहिल्यांदा बाजारसमितीच्या निवडणुका जाहीर केल्या होत्या, पण सोसायटीवर प्रशासक असल्याने त्या सदस्याना मतदानापासुन अलिप्त रहावे लागणार होते.

यामुळे या प्रक्रियेवर काहीनी न्यायालयात जाऊन आक्षेप घेतला, त्यावर न्यायालयानेही त्यांच्या बाजुने निकाल देऊन पहिल्यांदा सोसायट्याच्या निवडणुका घेण्याचे आदेश दिले. त्यासाठी कालमर्यादाही निश्चित करुन दिली होती, तरी त्या मर्यादेमध्ये ही प्रक्रिया अजुनही पुर्ण झालेली नाही.आता बाजारसमिती निवडणुका घेण्याचे आदेश आल्याने सेवा संस्थाच्या सदस्यामध्ये चिंतेचे वातावरण निर्माण झाले आहे.

सोसायट्यांना निवडणुकीचा खर्च करावा लागणार असल्याने त्यांच्याकडुन पैसे उपलब्ध होत नसल्याने ही प्रक्रिया होत नसल्याचे मुळ कारण आहे. किमान आता तरी संस्था पैसे काढून निवडणुकीसाठी पुढाकार घेतील अशी अपेक्षा व्यक्त होत आहे. बाजारसमितीच्या निवडणुक प्रक्रियेमध्ये अनेकवेळा खंड पडल्याने आतातरी ही प्रक्रिया ठरलेल्या तारखेनुसार होणार का असा प्रश्‍न विचारला जात आहे.