कोरड्या गोदापात्रात डोहापुरती मासेमारी 

कुंभार पिंपळगाव (जि.जालना) -  घनसावंगी तालुक्यातील गुंज परिसरातील कोरड्या गोदावरी नदीपात्रात आता डोहापुरती मासेमारी शिल्लक राहिली आहे. मत्स्य व्यावसायिक अडचणीत सापडलेले आहेत. 

चार वर्षांनंतर परतीच्या पावसाने गोदावरीला महापूर आला, दोन-चार महिने मत्स्यव्यवसाय जोमात चालला. त्यानंतर हळूहळू पाणी वाहून गेले, गोदावरी आटत गेली, पात्राचे वाळवंट झाले. पाणी, मत्स्यव्यवसायाला घरघर लागली. या व्यवसायावर उदरनिर्वाह असलेल्या कुटुंबांवर मात्र उपासमारीची वेळ आली आहे. 

हेही वाचा : बांधकामे ठप्प झाल्याने कामगारांचे हाल

परिसरात भादली, शिवणगाव, सिरसवाडी, गुंज, काळेगाव, कवडगाव आदी भागांत कहार समाजातील अनेक कुटुंब हा मत्स्यव्यवसाय करतात. गुंजमध्ये ६० ते ७० कुटुंबांची यावर उपजीविका आहे; मात्र यावर्षी जानेवारीपासूनच पाणीसाठा कमी कमी व्हायला सुरवात झाली. मार्च महिन्यात कोरोनामुळे मासे विकायला अडचण आली, तर एप्रिल आणि मे महिन्यात गोदावरीचे वाळवंट झाले. यामुळे मासे मिळणे अवघड झाले.

हेही वाचा : सकारात्मक राहा... हेही दिवस निघून जातील 

विकायला तर दूर कुटुंबापुरतेही मासे मिळणे अवघड झाले. काळुंकावस्तीजवळ असलेल्या छोट्या छोट्या डोहात आळीपाळीने एक जण जाळे टाकतो; मात्र जाळ्यात काहीच येत नाही. निराशा होते. काही न मिळताच अनेकांनी घरी परतावे लागते. 

गुंज येथे बंधाऱ्याची गरज 

गुंज येथे बंधारा नसल्याने आलेले पाणी लगेच वाहून जाते, तर वरच्या बंधाऱ्यातून खाली पाणी सोडल्या जात नाही. दोन-चार महिने मत्स्यव्यवसाय चालतो. त्यानंतर गोदावरी आटते. यामुळे पूर येईपर्यंत गोदावरीला थेंबही राहत नाही. त्यात वाळू उपसा असल्याने मोठी अडचण येते, पात्रात खड्डे पडतात. यासाठी गुंज येथे बंधारा असणे गरजेचे आहे, असे देविदास कचरे, गंगाधर बिजुरे यांनी सांगितले.