तरुणांची फसवणूक करणाऱ्यांना अटक

उस्मानाबाद : वैशाली जनआरोग्य सुरक्षा योजनेच्या नावाखाली तरुणांची फसवणूक करणाऱ्या टोळीला उस्मानाबाद शहरातील एका लॉजमधून अटक करण्यात आली आहे. फसवणूक झालेल्या तरुणांच्या फिर्यादीवरून आनंदनगर पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. सध्या पाच जणांना ताब्यात घेण्यात आले असून, यात आणखी काही जणांचा समावेश असण्याची शक्‍यता पोलिसांकडून वर्तविण्यात येत आहे.

याविषयी मिळालेली माहिती अशी, की एका वृत्तपत्रातून आरोग्यदूत या पदाची भरती होणार अशी जाहिरात देण्यात आली होती. अर्ज करण्यासाठी उस्मानाबाद येथील पत्ता देण्यात आला होता; तसेच अर्ज भरण्यासाठी 1200 रुपये भरण्यास सांगण्यात आले होते. त्याशिवाय मुलाखतीला आल्यानंतर उमेदवारांकडून कोरे धनादेशदेखील घेण्यात आल्याचे समोर आले आहे. नोकरी देण्याचे आमिष दाखवून तरुणांकडून पैसे उकळण्याचा प्रयत्न या टोळीने केला होता; मात्र ही बाब काही तरुणांच्या लक्षात आल्यानंतर त्यांनी पोलिसांना माहिती दिली.

सदस्याने कुजलेली पिके आणली अधिसभेत!

स्थानिक गुन्हे शाखेच्या पथकाने घटनास्थळी जाऊन पाहणी केली. तेव्हा मुलाखती घेणाऱ्यांनी नोंदणी न केलेल्या संस्थेच्या माध्यमातून जाहिरात प्रसिद्ध केल्याचे निदर्शनास आले. अधिक तपासात तरुणांची फसवणूक झाल्याचे स्पष्ट झाल्याने पोलिसांनी त्यांना ताब्यात घेतले. पृथ्वी मेडिकल फाउंडेशनच्या नावाने नोकरीचे आमिष दाखवून देणगी घेतल्याचे फिर्यादीत तरुणांनी नमूद केले. दरम्यान, किती जणांची फसवणूक झाली याची माहिती मिळालेली नसली तरी तक्रार देणाऱ्या तरुणांचा अनुक्रमांक 38 वा असल्याने ही संख्या मोठी असण्याची शक्‍यता व्यक्त होत आहे.