Honesty of the farmer : बळीराजा असतोच प्रामाणिक! गहाळ झालेले पॉकेट दोन तासांत मिळाले परत

सोयगाव : एसटीच्या कर्मचाऱ्याचे हरविलेलं पॉकेट इमानदार शेतकऱ्यांच्या निदर्शनास येताच अवघ्या दोनच तासात हरविलेलं पॉकेट एसटीच्या कर्मचाऱ्याला शेतकऱ्याने परत केल्याची घटना मंगळवारी दुपारी एक वाजता उघडकीस आली आहे.

सोयगाव परिवहन आगाराचे सहायक लिपिक राहुल नागरगोजे यांचे मंगळवारी अकरा वाजता खिशातील पॉकेट त्यात दोन हजार पाचशे रु रोकड व नोकरीची महत्वाचे कागदपत्रे असलेले पॉकेट हरविले पण तेच पॉकेट सोयगावातील एका ३२ वर्षीय राजेंद्र बोडखे यांना शहराच्या शिवाजी चौकात आढळून आले. त्यांनी या मिळालेल्या पॉकेटचा तपास घेत त्यांचे मित्र दत्ता गाडेकर यांच्या मदतीने पॉकेट मालकाचा शोध घेऊन त्यांना पॉकेट परत केले.

यामुळे या शेतकऱ्याच्या इमानदारीचे शहरात कौतुक होत आहे. दरम्यान सापडलेल्या पॉकेटचा खरा मालक शोधण्यात यश आल्यावर ते पॉकेट वाहतूक नियंत्रक सुरेश घोडेस्वार, दत्ता गाडेकर, नाना वानखेडे,गोपाल डोंगरे, योगेश बोखारे यांच्या हस्ते परत करण्यात आले.

दरम्यान नोकरीच्या संदर्भात महत्वाची कागदपत्रे असलेले पॉकेट परत मिळाल्याने एस टी कर्मचारी राहुल नांगरगोजे यांनी सुटकेचा श्वास सोडला मात्र राजेंद्र बोडखे या इमानदार शेतकऱ्याचे शहर भर कौतुक करण्यात आले.