Osmanabad | कळंबमध्ये पतीने पत्नीची केली कोयत्याने निर्घृण हत्या

कळंब (जि.उस्मानाबाद ) : कळंब (Kalamb) तालुक्यातील रांजणी येथे अज्ञात कारणाने पतीने ५५ वर्षीय पत्नीवर कोयत्याने वार करून तिला ठार मारल्याची घटना मंगळवार (ता.एक) पहाटेच्या सुमारास घडली. मंगल विठ्ठल संगापुरे असे मृत महिलेचे नाव आहे. या प्रकरणी शिराढोण पोलिस ठाण्यात गुन्हा दाखल करण्यात आला असून पती विठ्ठल संगापुरे याला पोलिसांनी अटक केली आहे. दरम्यान विठ्ठल हा मनोरुग्ण असून मागील काही वर्षांपासून औषध गोळ्या सुरू आहेत. यातून हे क्रूर कृत्य केले असावे अशी चर्चा आहे. पोलिसांनी सांगितले की, रांजणी शिवारात तटबोरगाव रस्त्यावर शेतात विठ्ठल संगापुरे आपल्या पत्नी सोबत वास्तव्यास होते. मंगळवार (ता.एक) पहाटे १२ ते ४ वाजेच्या सुमारास पत्नी मंगल हिच्यावर कोयत्याने गळ्यावर तसेच चेहऱ्यावर वार केले. त्यात वय ५५ वर्षे असलेली मंगल गंभीर जखमी होऊन तिचा मृत्यू झाला. (Osmanabad)

दुपारी १२ वाजण्याच्या सुमारास रांजणीचे सरपंच श्री आगरकर यांनी शिराढोण पोलीसांना सदरील घटनेची माहिती दिली. माहिती मिळताच सहायक पोलीस अधीक्षक एम.रमेश, सहायक पोलीस निरीक्षक वैभव नेटके, पोलीस उपनिरीक्षक गणेश गोडसे, पोलीस कर्मचारी शिवाजी गवळी, शौकत पठाण यांनी घटनास्थळी धाव घेतली. घटनास्थळाची पाहणी करुन पोलीस पंचनामा करुन आरोपी विठ्ठल संगापुरे यास ताब्यात घेतले. मृत महिलेचे शवविच्छेदन शिराढोण येथील प्राथमिक आरोग्य केंद्रात करण्यात आले. पत्नीचा खुण करण्यामागचा उद्देश मात्र स्पष्ट होवू शकलेला नाही. या प्रकरणी शिराढोण पोलिस ठाण्यात गुन्हा दाखल करण्यात आला असून मारेकरी विठ्ठल यास पोलिसांनी अटक केली आहे.

पती मनोरुग्ण

रांजणी येथील या घटने संदर्भात तपासासाठी उस्मानाबाद येथील फाॅरेन्सिक विभागास सदरील माहिती दिल्यानंतर तेथून फाॅरेन्सिक विभागाच्या टीमनेही घटनास्थळी भेट देऊन तपासासाठी लागणारे नमुने हस्तगत केले. दरम्यान पत्नीचा खून करणारा विठ्ठल यांना मनोरुग्णच आजार आहे. गेल्या काही वर्षांपासून औषध गोळ्या सुरू आहेत, अशी रांजणी गावात चर्चा आहे.