Dharashiv Lok Sabha Election : धाराशिवमध्ये लोकसभेत MIM इतर पक्षांचे गणित बिघडवणार? इम्तियाज जलील यांनी सांगितला प्लॅन

धाराशिव : राज्यातील लोकसभा निवडणूका लढविण्यासाठी आम्ही ठरवलेल्या यादीत धाराशिव मतदार संघाचेही नाव आहे. इथून आमच्याकडून निवडणूक लढविण्यास अनेक दिग्गज इच्छुक आहेत. मात्र महायुतीसह आघाडीच्या व अन्य पक्षांच्या उमेदवारांची यादी प्रसिद्ध झाल्यानंतर आम्ही आमचा उमेदवार जाहीर करणार आहोत. अशी माहिती एमआयएम पक्षाचे प्रदेशाध्यक्ष खासदार इम्तियाज जलील यांनी दैनिक ‛सकाळ’ला दिली आहे.

सध्या कोणतीही आघाडी किंवा युती एकत्र नसल्याचे चित्र आहे. सर्वत्र फाटाफूट दिसत आहे. याचा आम्ही कानोसा घेत आहोत. आशा परिस्थीतीत आमच्या उमेदवाराला निश्चित लाभ मिळू शकणार आहे. अशी परिस्थिती आहे. सध्या आमच्याकडे धाराशिव येथून निवडणुकीसाठी अनेक जण इच्छुक आहेत. यातील कोणाला उमेदवारी द्यायची हा निर्णय पक्षाच्या वरीष्ठस्तरावर होणार आहे. स्थानिक पदाधिकाऱ्यातूनही कोणी इच्छुक असेल तरी स्थानिक पदाधिकाऱ्यांना उमेदवारी घोषित करण्याचा अधिकार नाही. पक्षाचे वरिष्ठ मंडळ याबाबतीत निर्णय घेऊन तशी घोषणा करतील. असेही जलील यांनी सांगितले आहे.

दरम्यान एमआयएमचे धाराशिव जिल्हाध्यक्ष सिद्दीक इब्राहिम बौडीवले तथा गोलाभाई यांनीही लोकसभा निवडणूक लढविण्याची तयारी सुरू केली आहे. आपण इथून इच्छुक उमेदवार असल्याचेही त्यांनी सांगितले आहे. मात्र पक्षाची वरिष्ठ मंडळी अंतिमतः जो उमेदवार घोषित करतील त्यासाठी सर्व ताकतीनिशी पक्षाचा प्रचार आपण करू असेही बौडीवले यांनी सांगितले आहे.