Jalna Accident : अंबडमधील पोलिस वसाहतीजवळ अपघात, एक जण जागीच ठार

अंबड (जि.जालना) : अंबड (Ambad) शहरातील पाचोड मार्गालगत असलेल्या पोलिस वसाहतीजवळ गुरुवारी (ता.३) रात्री साडेआठ वाजेच्या दरम्यान नगरपालिकेतील कर्मचारी कपिल सुभाषराव राहटगावकर (वय ४२) व गणेश तुपे हे दोघे दुचाकीवरून पारनेर पेट्रोलपंपाकडे जात असताना टाटा मॅजिक व दुचाकीची जोराची धडक झाली. यामध्ये कपिल राहटगावर गंभीर जखमी झाल्याने त्यांना जालना (Jalna Accident) येथे उपचारासाठी घेऊन जात असताना रस्त्यातच त्यांचा मृत्यू झाला. जालना येथील जिल्हा रुग्णालयात रात्री उशिरापर्यंत त्यांचे शवविच्छेदन सुरू होते.(In Ambad Accident Take Place Near Police Colony, A Man Died)

दुचाकीवरील गणेश तुपे हे किरकोळ जखमी झाला आहे. त्यांच्यावर अंबड शहरात प्राथमिक उपचार करण्यात आले आहे. या घटनेची वार्ता संपूर्ण शहरात पसरताच सर्वत्र हळहळ व्यक्त करण्यात येत आहे. कपिल राहटगावकर यांच्या पश्चात पत्नी, एक मुलगा, एक मुलगी, आई, चार भाऊ व बहिणी असा मोठा परिवार आहे.