लॉकडाउन: नांदेडकरांना दिलासा... दुसऱ्या टप्यात मास्क वापरणे बंधनकारक

नांदेड: जिल्ह्यात कोरोना संसर्गाच्या बाबतीत परिस्थिती नियंत्रणात असून जिल्ह्यात बुधवारी (ता.१५ एप्रिल २०२०) संध्याकाळपर्यंत एकही पॉझिटिव्ह रुग्ण आढळला नाही. आतापर्यंत एकूण क्वारंटाइन ५०३, तर क्वारंटाइन कालावधी पूर्ण करणाऱ्यांची संख्या १४० इतकी आहे. निरीक्षणाखाली असलेल्या व्यक्तींची संख्या ४३ आहे. त्यापैकी दवाखान्यात (यात्रिनिवास) क्वारंटाइनमध्ये ३९ जण आहेत. घरीच क्वारंटाइनमध्ये असलेले ५०३ जण आहेत. आज तपासणीसाठी सर्वाधिक ४२ जणांचे स्वॅब नमुने घेतली. एकूण २७४ नमुने तपासणी पैकी २२६ निगेटिव्ह, तर ४३ जणांचे नमुने तपासणी अहवाल बाकी आहेत.

जिल्ह्यात बाहेरुन आलेले एकूण प्रवाशांची संख्या ७३ हजार ६७९ असून, त्यांना त्यांच्या घरीच राहण्याचा सल्ला दिला आहे. तसेच त्यांच्या हातावर शिक्केही मारण्यात आले असल्याची माहिती नांदेड जिल्हा आरोग्य विभागामार्फत देण्यात आली आहे. नांदेड जिल्ह्यात बुधवारपर्यंत कोरोनाबाधित एकही रुग्ण आढळला नसला तरी, आरोग्य मंत्रालयाच्या मार्गदर्शक तत्वानुसार सार्वजनिक ठिकाणी व कामाच्या ठिकाणी प्रत्येक नागरिकांनी सोशल डिस्टन्सचे तंतोतंत पालन करावे, कुठल्याही संस्थेने किंवा सार्वजनिक कामाच्या ठिकाणच्या व्यवस्थापकाने पाच पेक्षा जास्त लोकांना एकत्र जमण्याची परवानगी देऊ नये, तसेच लग्न आणि अंत्यसंस्काराच्या वेळीदेखील जास्त लोक एकत्र येणार नाहीत याची सर्वती खबरदारी घ्यावी, अशा आरोग्य विभागाने सूचना दिल्या.

हेही वाचा- Video: ग्रामीण भागातील विद्यार्थ्यांच्या अभ्यासासाठी शिक्षकांची धडपड...कशी ते वाचा...

नियमांचे काटेकोर पालन करण्याचे आदेश

जिल्हा दंडाधिकाऱ्याने नियमन करावे व सार्वजनिक ठिकाणी थुंकणाऱ्यांवर दंड आकारण्यात यावा, तसेच दारू, गुटखा आणि तंबाखू अशा आमली पदार्थांची विक्री करण्यावरदेखील बंदी घालावी, अशा सूचना जिल्हा प्रशासनास देण्यात आल्या आहेत.
लॉकडाउनच्या दुसऱ्या टप्प्यात सार्वजनिक आरोग्य विभागाने घालून दिलेल्या नियमांचे काटेकोरपणे पालन करण्याचे आदेश गृहमंत्रालयाकडून जारी करण्यात आले आहेत. 

हेही वाचा-  Video : ग्रीन झोनमधील उद्योग-व्यवसाय सुरु व्हावेत

नियमावलीच्या आधारे भाजी मार्केट सुरु

याशिवाय सिनेमागृह, स्विमिंगपूल, हॉटेल, जिम, स्पोर्ट कॉम्प्लेक्स, अशी गर्दीची ठाकाणे ता. तीन मे २०२० पर्यंत बंद ठेवण्याचे आदेशदेखील यामध्ये देण्यात आले आहेत. या सोबतच सर्व प्रकारची प्रवासी वाहतूक बंद ठेवण्यात येणार असल्याचे सांगितले आहे. आरोग्य खात्याने घालून दिलेल्या नियमावलीच्या आधारे भाजी मार्केट, मंडी स्पेशल परवान्याच्या आधारे चालू राहतील, असे सांगण्यात आले आहे. देशात आणि महाराष्ट्रात दररोज कोरोना रुग्णांची संख्या वाढत असल्याने नांदेडकरांनादेखील तोंडावर मास्क लावण्याकडे दुर्लक्ष करता येणार नाही.