Nilanga Accident News : कंटेनर-दुचाकी धडकेत तिघांचा मृत्यू ; निलंगा तालुक्यातील झरी येथील घटना,वाहतूक तीन तास ठप्प

निलंगा : कंटेनरने धडक दिल्यामुळे दुचाकीवरील चुलती-पुतण्यासह तिघे ठार झाल्याची घटना उदगीर- निलंगा मार्गावरील झरी (ता. निलंगा) येथे गुरुवारी सकाळी सहाच्या सुमारास घडली. धडकेनंतर कंटेनर उलटला.

झरी येथील कृष्णा अर्जुन जाधव (वय २२), त्यांची चुलती कस्तुराबाई परमानंद जाधव (३८) हे आठ दिवसांपूर्वीच खरेदी केलेल्या मोटारसायकलवरून शेताकडे दूध काढण्यासाठी जात होते. यावेळी कंटेनरने मोटारसायकलला धडक दिली. त्यात पुतण्यासह चुलती जागीच ठार झाली. याच दरम्यान या रस्ताने जाणाऱ्या अक्षरबाई किशन सूर्यवंशी (वय ५५) हिला दोन्ही वाहनांची धडक बसली. त्यात तिचा मृत्यू झाला. धडकेनंतर कंटेनर उलटला. तिघेही कंटेनरखाली अडकले होते.

अपघातामुळे उदगीर-निलंगा मार्गावरल वाहतूक सुमारे तीन तास बंद होती. पोलिसांनी दोन क्रेन, एका जेसीबीच्या साह्याने उलटलेला कंटेनर बाजूला केला आणि वाहतूक सुरळीत केली. कंटेनरसह चालकाला पोलिसांनी ताब्यात घेतले आहे.

तिघांचे मृतदेह उत्तरीय तपासणीसाठी रुग्णालयात पाठविले. पोलिस निरीक्षक बाळकृष्ण शेजाळ यांनी घटनास्थळी भेट देऊन पुढील कारवाईचे आदेश दिले. अर्जुन वामनराव जाधव (रा. झरी) यांनी दिलेल्या फिर्यादीवरून कंटेनरचालक माधव प्रभू घोडके (४० रा. जवळगा, ता. देवणी) यांच्यावर निलंगा पोलिस ठाण्यात गुन्हा दाखल झाला.