Sengaon News : अवयव विक्रीसाठी गेलेल्या शेतकऱ्यांनी गाजवली मुंबई; ‘त्या’ शेतकऱ्यांनी घेतली उद्धव ठाकरेंची भेट

सेनगाव - तालुक्यातील अवयव विक्री करणाऱ्या दहा शेतकऱ्यांनी जलसमाधी घेण्याचा निर्णय घेतल्यानंतर मुंबई पोलिसांनी त्यांना ताब्यात घेतले होते. त्यानंतर बाहेर येताच त्यांनी माजी मुख्यमंत्री उद्धव ठाकरेंची शुक्रवारी भेट घेऊन आमच्यावर अवयव विक्रीची वेळ का आली, याबाबत चर्चा केली.

सेनगाव तालुक्यातील अवयव विक्रीला काढून मुंबईत गेलेल्या त्या दहा शेतकऱ्यांनी सरकार दखल घेत नसल्याने मुंबईतील समुद्रात जलसमाधी घेण्याचा निर्णय घेतला होता. यामुळे गुरुवारी मुंबई पोलिसांनी त्यांना ताब्यात घेतले होते. त्यानंतर शुक्रवारी पोलिस ठाण्यातून बाहेर आल्यानंतर त्या शेतकऱ्यांनी शिवसेनाप्रमुख माजी मुख्यमंत्री उद्धव ठाकरे यांची भेट घेतली. शेतकऱ्यांच्या प्रश्नासंबंधी लवकरच माध्यमांशी संवाद साधणार असल्याचे उपस्थित शेतकऱ्यांना ठाकरे यांनी सांगितले.

काय आहे प्रकार?

गेल्या काही दिवसांपूर्वी पीककर्जावरून सेनगाव तालुक्यातील दहा शेतकऱ्यांनी स्वतःचे अवयव विक्रीला काढले होते. एवढेच नाही तर ते विक्री करण्यासाठी मुंबईतही गेले. मात्र, त्या ठिकाणी त्यांची कुणीही दखल घेत नसल्यामुळे त्यांनी मुंबईतील समुद्रात जलसमाधी घेण्याचा कठोर निर्णय घेतला होता. यामुळे गुरुवारी मुंबई पोलिसांनी त्यांना ताब्यात घेतले होते.

शेतकऱ्यांनो अवयव विक्रीचा विचार करू नका. सर्व शेतकऱ्यांनी एकत्र या. कृषिमंत्र्यांनी कुठल्याही एका घरात बसून काम करावे. घटनाबाह्य सरकारला ताकद दाखवून द्या. पंचनामे करण्यापेक्षा सरसकट नुकसान भरपाई द्या. या सरकारने जबाबदारी घेतली आहे तर ती जबाबदारी पार पाडा. शेतकऱ्यांना कर्जमुक्त करा.

- उद्धव ठाकरे, माजी मुख्यमंत्री