उस्मानाबाद : पहिल्याच पावसाने ईट मंडळातील आठही बंधारे तुडुंब..!  

ईट (उस्मानाबाद) : परिसरातील डोकेवाडी, गिरवली, सोन्नेवाडी, अंजनसोंडा, लांजेश्वर, आंद्रुड, पखरूड, निपाणी या भागात बुधवारी (ता. १०) रात्री जोरदार पाऊस झाला. ईट महसूल मंडळात अतिवृष्टी झाली असून, ९९ मिलिमीटर पाऊस नोंदला गेला. तीन तास जोरदार पाऊस झाल्यामुळे परिसरातील लेंढी, आंबेहोळ, मांजरा या नद्यांच्या पात्रातून पाणी वाहिले. या नद्यांच्या पात्रात असलेले सर्व बंधारे तुडुंब भरून पाणी वाहत आहे. पहिल्याच पावसामध्ये सर्व बंधारे भरल्यामुळे शेतकऱ्यांमध्ये आनंदाचे वातावरण निर्माण झाले आहे. 

लॉकडाउनचे मानगुटी भूत, पुन्हा अफवांना ऊत!   

डोकेवाडी (ता. भूम) येथील नागरिकांनी लोकसहभागाच्या माध्यमातून मागील तीन वर्षांपूर्वी आंबेहोळ नदीचे तीन किलोमीटरचे खोलीकरण व रुंदीकरण केले होते. या नदीवर एकूण आठ बंधारे आहेत. हे सर्व बंधारे तीन तास झालेल्या पावसामुळे भरले आहेत. त्यामुळे आता डोकेवाडीचा पाणीप्रश्न मिटणार आहे. या नदीवरील सर्व बंधारे ओव्हरफ्लो झाल्याने गेल्या एक वर्षाच्या प्रतीक्षेनंतर प्रथमच यावर्षी नदीपात्र दुथडी भरलेले असल्याचे दिसत आहे.

औरंगांबादेतील बहीण-भावाच्या हत्याकांडामागे ओळखीचेच ?  

ईट परिसरातील सर्व नदी-नाले प्रवाहित झाले आहेत. शेतात पाणी साचले आहे. सर्वच छोटे-मोठे नदी-नाले दुपारपासून ओसंडून वाहू लागले आहेत. या पावसामुळे शेतातील भाजीपाल्याचे मोठे नुकसान झाले आहे. 
एक वर्षांनंतर पहिल्यांदाच परिसरातील सर्व बंधारे तुडुंब भरून वाहू लागले आहेत. या भागातील मांजरा नदीही पावसामुळे वाहती झाली आहे. सर्व बंधारे तुडुंब भरून नद्यांना आलेले पाणी, बंधारे पाहण्यासाठी नागरिकांनी गर्दी केली होती. 

महाबीजकडून औरंगाबादेत ६४ क्विंटल तूर बियाणे उपलब्ध  

जिल्ह्यात सर्वदूर पाऊस 

जिल्ह्यात यंदा मॉन्सूनपूर्व पावसाने चांगली हजेरी लावली असून, बुधवारी रात्री झालेल्या पावसाने संपूर्ण जिल्ह्यात सरासरी ३४ मिलिमीटर पावसाची नोंद झाली आहे. भूम तालुक्यातील ईट महसूल मंडळात अतिवृष्टी झाली. जिल्ह्यात सर्वाधिक ९९ मिलिमीटर पावसाची नोंद झाली आहे. तर भूम महसूल मंडळात ७१ मिलिमीटर पाऊस झाला आहे. तर तालुक्यात सर्वात कमी अंबी महसूल मंडळात केवळ १२ मिलिमीटर पाऊस झाला आहे. 

उस्मानाबाद शहर, तालुक्यात चांगला पाऊस तालुक्यात अनेक भागांत चांगला पाऊस झाला आहे. त्यामुळे नद्या, नाले ओसंडून वाहिले आहेत. गेल्या अनेक वर्षांपासून दुष्काळाच्या छायेत असलेल्या ढोकी, जागजी परिसरात चांगला पाऊस झाला आहे. तालुक्यात सर्वाधिक जागजी महसूल मंडळात ६३ मिलिमीटर तर ढोकी, पाडोळी प्रत्येकी ६२, तेर, केशेगाव प्रत्येकी ४६ मिलिमीटर पाऊस झाल्याची नोंद आहे. उस्मानाबाद ग्रामीण महसूल मंडळात ३८ मिलिमीटर पाऊस झाला असून शहरात सर्वात कमी २८ मिलिमीटर पाऊस झाला आहे. तुळजापूर तालुक्यातील सावरगाव महसूल मंडळात सर्वाधिक ६१ मिलिमीटर पावसाची नोंद झाली आहे. तर तुळजापूर २३, जळकोट १२, नळदुर्ग १४, मंगरूळ ३०, सलगरा १५ तर इटकळ मंडळात १० मिलिमीटर पाऊस झाला आहे. 

अन्यथा औरंगाबाद शहरात असते सात हजार रुग्ण 

इतर तालुक्यांतही पावसाची हजेरी 
उमरगा तालुक्यात बऱ्यापैकी पाऊस झाला असून डाळिंब महसूल मंडळात सर्वाधिक २३ मिलिमीटर पाऊस झाला आहे. तर उमरगा १८, मुरूम २२, नारंगवाडी १६, मुळज सात मिलिमीटर पावसाची नोंद झाली आहे. लोहारा तालुक्यात सरासरी २६ मिलिमीटर पाऊस झाला असून लोहारा ३४, माकणी ३० तर जेवळीत १६ मिलिमीटर पाऊस झाला आहे. कळंब तालुक्यात सरासरी ३६ मिलिमीटर पाऊस झाला असून कळंब १४, इटकूर १६, शिराढोण ३५, येरमाळा ४९, मोहा ४३ तर गोविंदपूर ५९ मिलिमीटर पावसाची नोंद झाली आहे. वाशी तालुक्यातील तिन्ही महसूल मंडळांत चांगला पाऊस झाला आहे. वाशीत ५७, तेरखेडा ४५ तर पारगाव महसूल मंडळात ५३ मिलिमीटर पावसाची नोंद झाली आहे. परंडा तालुक्यात सरासरी २१ मिलिमीटर पाऊस झाला असून परंडा २०, जवळा (बु.) २९, अनाळा आठ, सोनारी २० तर आसू महसूल मंडळात २८ मिलिमीटर पावसाची नोंद झाली आहे.