अत्यावश्‍यक वाहनांसाठीच आता रस्ते खुले 

जालना - कोरोना विषाणूचा प्रसार रोखण्यासाठी लॉकडाऊन असताना देखील जालना शहरात दुचाकीसह खासगी चारचाकी वाहनांची वर्दळ सुरूच आहे. त्यामुळे आता पोलिस प्रशासनाकडून शहरातील प्रत्येक चौक सीलबंद करण्यात येत आहे. तसेच विनाकारण फिरणाऱ्या दुचाक्या आणि खासगी वाहने पोलिस प्रशासनाकडून जप्त करून दंडात्मक कारवाई करण्यात येत आहे. 

कोरोना विषाणूचा प्रसार थांबविण्यासाठी पोलिस प्रशासनाकडून शहरातील नागरिकांनी रस्त्यावरील गर्दी कमी करावी असे आवाहन करीत आहेत. मात्र, तरी देखील रस्त्यावर दुचाक्या आणि खासगी वाहनांची वर्दळ कमी होण्यास तयार नाही. त्यामुळे पोलिस प्रशासनाकडून अत्यावश्यक सेवा देणाऱ्या वाहनांना स्टिकर्स देण्यात आले आहेत.

हेही वाचा : जालन्याच्या इतिहासात प्रथमच स्टील उद्योग बंद

शहरातील प्रत्येक चौक सीलबंद करण्याचे काम पोलिस प्रशासनाकडून सुरू आहे. शहरात प्रवेश करणाऱ्या चौकावर देखील बॅरिकेड्स बसविण्याचे काम सुरू केले आहे. शहरातील गल्लीबोळातून फिरणाऱ्या दुचाकी, खासगी वाहनांना आळा घालण्यासाठी शहरातील काही चौकात बॅरिकेड्स बसविण्यात आले असून, काही चौकात बॅरिकेड्स बसविण्याचे काम सुरू आहे.

हेही वाचा : जालना जिल्ह्यात ३२ चेकपोस्ट

शहरातील चौक सीलबंद केल्यामुळे आता शहरातील रस्त्यांवर विनाकारण फिरणाऱ्या दुचाक्या आणि खासगी वाहनांना आळा बसेल अशी अशा आहे. शहरातील मामा चौक येथे बॅरिकेड्स बसविण्याच्या कामाची पाहणी सदर बाजार पोलिस ठाण्याचे पोलिस निरीक्षक संजय देशमुख, वाहतूक शाखेचे पोलिस निरीक्षक चतुर्भुज काकडे, सहायक पोलिस निरीक्षक सुरेश भाले आदींनी केली. 

चौकाचौकात केली जातेय तपासणी 

पोलिस प्रशासनाने अत्यावश्यक सेवा देणाऱ्यांना स्टिकर्स दिले आहेत. त्यामुळे शहरातील प्रत्येक चौकात पोलिसांकडून वाहनधारकांकडे पोलिस प्रशासनाने दिलेल्या स्टिकर्सची पाहणी करून दुचाकी, चारचाकी वाहनांना सोडले जात आहेत. 

शहरात प्रवेश करणारे सर्व चौक सीलबंद करण्यात आले आहेत. तसेच शहरातील प्रत्येक चौकात बॅरिकेड्स बसविण्यात येत असून, तेथे पोलिस कर्मचारी तैनात आहेत. यामुळे रस्त्यावर विनाकारण फिरणाऱ्या वाहनांची गर्दी कमी होणार आहे. 
- सुधीर खिरडकर, उपविभागीय पोलिस अधिकारी, जालना.