गावठी कट्ट्याची गोळी लागून महिला गंभीर जखमी, उस्मानाबादेतील धक्कादायक घटना

तुरोरी (जि.उस्मानाबाद) : येथील राष्ट्रीय महामार्गावरील ज्ञानेश्वर श्रीमंत जाधव यांच्या घराजवळ देशी कट्ट्यातून गोळी लागून पूजा सागर जाधव (वय २५) ही महिला गंभीर जखमी झाली आहे. ही घटना शुक्रवारी (ता.१८) रात्री उघडकीस आली. या घटनेविषयी पोलिसांनी सांगितले कि, ज्ञानेश्वर जाधव यांचे घर राष्ट्रीय महामार्गावर आहे मंगळवारी (ता.१५) सायंकाळी त्यांची सून पूजा घरासमोरील अंगणात कचरा झाडत असताना तिला पिस्तूल नजरेस पडले. त्यावेळी तिला ते पिस्तूल खेळण्यातील असल्यासारखे वाटले व ते हातात घेऊन पाहत असताना अचानक व अनावधानाने गोळी झाडली गेली व गोळी छातीखाली पोटात लागून पूजा गंभीर जखमी झाल्या आहेत. (Woman Injured In Country Side Gun Firing In Turori Village Of Osmanabad)

त्यांच्यावर सोलापूर येथील यशोधरा हॉस्पिटलमध्ये उपचार करण्यात येत आहेत. सदरील घटना घडून चार दिवस उलटून गेल्यानंतर याचा सुगावा पोलिसांना लागल्याने पोलिस हवालदार वाल्मिक कोळी यांच्या फिर्यादीवरून अज्ञात व्यक्तिविरूद्ध गुन्हा दाखल करण्यात आला आहे. घटनास्थळी उपविभागीय पोलिस अधिकारी रमेश बरकते यांनी धाव घेऊन चौकशी सुरू केली आहे. घटनास्थळी सहायक पोलिस निरीक्षक महेश क्षीरसागर, एस.बी. बरकते, पोलिस पाटील प्रशांत पाटील यांच्यासह मोठा फौज फाटा दाखल झाला आहे.(Osmanabad)