हुश्‍शऽऽऽ युवकाचा ताप होतोय कमी 

बदनापूर (जि.जालना) - मुंबईहून बदनापूरला परतलेल्या एका तरुणास ताप आल्याने विलगिकरण कक्षात दाखल करण्यात आले होते, सध्या त्याला कुठलाही श्वसन विकार, सर्दी नसल्यामुळे तूर्त त्याची कोरोनाची तपासणी करण्याची गरज नाही. त्याचा तापही कमी झाला, अशी माहिती ग्रामिण रुग्णालयाचे प्रभारी अधीक्षक डॉ. ओम ढाकणे यांनी मंगळवारी (ता. २४) दिली.

देशासह राज्यात कोरोना विषाणूचा प्रादुर्भावाच्या पार्श्‍वभूमीवर बदनापूर येथील ग्रामिण रुग्णालयात विलगिकरण कक्ष स्थापन करण्यात आले असून मागासवर्गीय विद्यार्थ्यांच्या वसतिगृहाची इमारत अलगिकरण कक्षासाठी निश्चित करण्यात आली आहे. 

हेही वाचा : जालना जिल्ह्यात ३२ चेकपोस्ट

राज्यात कोरोना विषाणूग्रस्त रुग्णांची संख्या वाढत असल्यामुळे शासनाने कोरोनाचा संसर्ग टाळण्यासाठी थेट संचारबंदी आणि जिल्हाबंदीचा निर्णय लागू केला आहे. शिवाय प्रशासन आणि आरोग्य यंत्रणेमार्फत देखील कोरोनाचा संसर्ग टाळण्यासाठी युद्धपातळीवर तयारी करण्यात येत आहे.

हेही वाचा : ग्रामीण भागातील हार्वेस्टरचीही चाके थांबली

याच पार्श्वभूमीवर बदनापूर येथील ग्रामिण रुग्णालयात विलगिकरण कक्ष स्थापन करण्यात आले आहेत. यात कोरोनाशी संबंधित लक्षणे असलेल्या व्यक्तीला दाखल करण्यात येणार आहे. तर ग्रामीण रुग्णालयाला खेटूनच असलेल्या मागासवर्गीय विद्यार्थ्यांच्या वसतिगृहाच्या पाठीमागील इमारतीत अलगिकरण कक्ष निश्चित करण्यात आले आहे. या कक्षात बाहेरगावाहून आलेले मात्र कोरोनाच्या संदर्भात कुठलीच लक्षणे नाहीत अशा लोकांना दाखल करण्यात येणार आहे, अशी माहिती डॉ. ढाकणे यांनी दिली. 

हेही वाचा :  रिकामचोटांच्या पार्श्‍वभागावर बसतायत फटके

दरम्यान, बदनापूर येथील ३० वर्षीय तरुण मुंबई येथे नोकरी करतो. तो दोन दिवसांपूर्वी बदनापूरला पोचला. त्याची आरोग्य तपासणी केली असता त्यास ताप असल्याचे निदर्शनास आल्याने त्यास विलगिकरण कक्षात दाखल केले आहे. त्याचा तापही कमी झाला असून त्यास २८ मार्चला सुटी मिळू शकते, अशी माहिती डॉ. ढाकणे यांनी मंगळवारी दिली.

घाबरून नका, मात्र काळजी घ्या

कोरोनाच्या बाबतीत कुणीही घाबरून जाऊ नये, मात्र काळजी घ्यावी. बाहेरगावाहून परतणाऱ्या आपल्या माणसांची माहिती प्रशासनास द्यावी, त्यांची आरोग्य तपासणी करण्यात येईल. कोरोनाच्या पार्श्वभूमीवर कुठलीही लक्षणे दिसून आली तर तातडीने वैद्यकीय अधिकाऱ्यांशी संपर्क साधावा. शासन व प्रशासन सांगत असलेल्या सूचनांचे पालन तंतोतंत करावे, अशी माहिती डॉ. ढाकणे यांनी दिली. 
..............