मुंबईत दहा वर्षांत १३० मराठी शाळा बंद

मुंबई : महापालिकेच्या १३० मराठी शाळांना गेल्या दहा वर्षांत टाळे लागले आहे, तर याच काळात विद्यार्थी संख्याही एक लाखावरून ३५ हजारांवर आली आहे. दुसऱ्या बाजूला महापालिका इंग्रजी शाळांबरोबर राज्य बोर्डाव्यतिरिक्त इतर बोर्डाच्या शाळा सुरू करण्यावर भर देत आहे.

महापालिकेने सीबीएसई आणि आयसीएसई बोर्डाच्या शाळा सुरू करण्याचा निर्णय घेतला आहे. तसेच इंग्रजी माध्यमाच्या शाळाही सुरू करण्यात येत आहेत; मात्र दुसऱ्या बाजूला मराठीसह इतर भाषिक शाळांची संख्या कमी होत आहे. २०१०-११ मध्ये पालिकेच्या मराठी शाळांची संख्या ४१३ होती, तर विद्यार्थ्यांची संख्या एक लाख दोन हजारांहून अधिक होती. २०१९-२० या वर्षात शाळांची संख्या २८३ पर्यंत खाली आहे. विद्यार्थ्यांची संख्या ३५ हजार १८१ झाली आहे. मराठी शाळांची पटसंख्या दर वर्षी घटत आहे, अशी माहिती भाजपचे आमदार अमित साटम यांनी महापालिका प्रशासनाकडून मिळवली. शिवसेनेवर निशाणा महापालिकेची सत्ता शिवसेनेच्या ताब्यात आल्यापासून गेल्या तीन वर्षांत मराठी माणूस मुंबईबाहेर फेकला गेला. मराठी शाळांची संख्याही घटत आहे. अशा स्थितीत २०२७ पर्यंत मुंबईत मराठी शाळाच राहणार नाहीत, अशी परिस्थिती येऊ शकते, असा टोला आमदार अमित साटम यांनी लगावला. २०१३ नंतर आवश्यकतेनुसार शिक्षकांची भरतीही झाली नसल्याचे त्यांनी सांगितले.