आठ वर्षांच्या लढ्याला आलं यश, अखेर विद्यापीठातील अस्थायी कर्मचाऱ्यांसाठी आली गोड बातमी

मुंबई : मुंबई विद्यापीठाच्या विविध आस्थापनेवर मागील अनेक वर्षांपासून कार्यरत असलेल्या अस्थायी कर्मचाऱ्यांना लवकरच किमान वेतन मिळणार आहे. या वेतनासाठी मागील आठ वर्षांपासून कर्मचारी संघटना, सिनेट सदस्यांनी मागणी लावून धरली होती. मुंबई विद्यापीठातील अस्थायी कर्मचाऱ्यांच्या या निर्णयामुळे राज्यातील सर्व अकृषी विद्यापीठात कार्यरत असलेल्या कर्मचाऱ्यांनाही याचा लाभ होणार आहे.

महत्त्वाची बातमी : अंबानी स्फोटके प्रकरण : जैश उल हिंदच्या नावाने आलेल्या टेलिग्राम मेसेजचं लोकेशन समजलं

मुंबई विद्यापीठातील या अस्थायी कर्मचाऱ्यांच्या किमान वेतनासाठी उच्च व तंत्रशिक्षण विभागाने नुकतेच एक परिपत्रक जारी केल्याने यासाठी विद्यापीठात कार्यरत असलेल्या 900 हुन अधिक कर्मचाऱ्यांनी या निर्णयाचे स्वागत केले आहे. तर त्यामुळे अशाच प्रकारे मुंबई विद्यापीठाच्या सेवेत असलेल्या सुरक्षा रक्षकांच्या वेतनातील तफावत दूर केली जावी अशी मागणी सिनेट सदस्यांनी केली आहे.

विद्यापीठातील बहुतांश कामकाज हे कंत्राटी तत्वावर नेमण्यात आलेल्या कर्मचाऱ्यांच्या माध्यमातून सुरू आहे, यात अनेक कर्मचारी हे मागील 10 ते 15 वर्षांपासून कार्यरत असून त्यांना विद्यापीठाच्या कंत्रातदारांकडून मानधन म्हणून केवळ 8 ते 9 हजार रुपयांची बोलवण केली जात होती. विद्यापीठाच्या अत्यंत महत्वाच्या कामात कार्यरत असलेल्या या अस्थायी कर्मचारी वर्गाला कायमस्वरूपी करावे अशी मागणी केली जात होती. यासाठी मुंबई विद्यापीठाच्या सिनेटमध्ये अनेकदा चर्चा ही झाली होती, मात्र त्यावर निर्णय झाला नव्हता.

महत्त्वाची बातमी : सचिन वाझे यांनी घेतली पोलिस आयुक्तांची भेट, उद्या बाजू मांडण्याची शक्यता

दरम्यान, कंत्राटी आणि विद्यापीठात कायमस्वरूपी असलेल्या सुरक्षा रक्षकांच्या वेतानातही मोठी तफावत आहे. त्यात विद्यापीठाने मागील काही वर्षात बाह्य संस्थेकडून हे सुरक्षा रक्षक नेमल्याने यावर अद्यापही वाद सुरू आहेत.